DILI, 17 juñu (TATOLI)-Operasaun ne’ebé hanaran “Aplika Lei, Dili Hakmatek” ne’ebé ezekuta hosi Komandu Polísia Nasional Timor-Leste (PNTL) ba area jurisdisaun Dili nian konsege kaer no detein ona ema na’in neen (6) ne’ebé lori sasán kro’at inklui viola regra tránzitu nian.
Komandante Komandu Operasionál Nasionál (KKON), Superintendente Xefe Pedro Belo, ohin, iha Kuartél Jerál PNTL, informa, operasaun “Aplika Lei, Dili Hakmatek” envolve Unidade Polisia Espesiál Seksaun Anti Terrorizmu (UPEAT) no unidade polisia seluk kaer uluk autór na’in rua ho inisiál AD no AS ne’ebé lori sasán kro’at hanesan tudik no martelu iha estrada Rotunda Prezidente Nicolau Lobato, Comoro Dili, iha kinta kalan (13/06/2019).
Operasaun ne’e kaer mós membru organizasaun arte marsiál na’in rua ne’ebé uza farda arte marsiál nian no kondutór na’in rua ne’ebé viola regra tránzitu tanba lori karreta la iha karta kondisaun (SIM-sigla indonézia).
“Ema sira ne’ebé kaer agora detein hela iha sela Polisia Munisípiu Dili hodi hein aprezenta ba Tribunál Dili,” informa Superintendente Xefe Pedro Belo.
Operasaun ne’e prende mós motór hamutuk 18, inklui karreta rua (2) ne’ebé la iha dokumentu no sira ne’ebé viola regra tránzitu nian sei selu multa ba estadu tuir lei.
Operasaun ne’e, Komandu PNTL sei hala’o iha tempu kalan no loron hodi buka kaer autór sira ne’ebé kontinua hamosu konflitu iha Dili, Baucau, Bobonaro no Covalima.
“Se ema malandru sei barak, operasaun sei aumenta forsa no kontinua halo operasaun too Dili moris hamatek,” afirma Pedro Belo.
Pedro Belo alerta ba populasaun hotu- hotu, liu-liu organizasaun arte marsiál atu labele koko hamosu konflitu, tanba PNTL sei la tolera ba kualkér krime ne’ebé mosu.
Parte seluk, Pedro Belo informa, PNTL mós kaer ona autór na’in rua ne’ebé deskonfia envolve iha kazu tuda kanek membru Unidade Polisia Fronteira (UPF) ida iha postu fronteira Bobonaro.
Membru UPF ne’e hala’o hela tratamentu iha ospitál Maliana hodi hein prosesu rekoopera saúde no parte polisia investigasaun kriminál kontinua investiga tan autór sira seluk ne’ebé deskonfia envolve iha kazu ne’e sei kaer hotu.
“Membru UPF ne’e, ema tuda iha ulun suku povu haat ka lima nune’e, maibé membru polisia Bobonaro kaer ona autór na’in rua hodi investiga nafatin,” dehan Pedro Belo.
PNTL mós kontinua investiga nafatin autór deskoñesidu na’in rua ne’ebé taa kanek ajente polisia Inácio de Carvalho (26) iha segunda kalan (10/06/2019), iha área 30 Agostu, Aldeia Anin Fuik, Suku Madohi, Postu Administrativu Don Aleixo, Munisípiu Dili.
PNTL mós sei kontinua investiga nafatin kazu ema deskoñesidu taa joven ida iha área Colmera, Dili, foin lalais ne’e.
Jornalista : Eugénio Pereira
Editór : Francisco Simões
