DILI, 18 juñu 2019 (TATOLI)– Tribunál Distritál Dili (TDD) aprova ona pedidu hosi Komandu Polisia Munisípiu Dili atu loke leilaun ba transporte públiku ne’ebé abandona ka prende hosi tinan 2000 too agora.
Komandu PNTL Dili nia pedidu ne’ebé aprezenta ba TDD hodi husu aseitasaun atu leilaun transporte sira ne’ebé rai butuk de’it iha aredór Komandu Polisia Dili tanba asidente tráfegu no na’in ba transporte sira la ba reklama too agora.
“Komesa semana rua liubá Tribunál Dili deside ona katak, (sasán) evidénsia sira ne’ebé polisia prende hosi 2000 too 2007 sa’e mai leten ne’e, liu-liu motór balun ne’ebé ninia identidade la iha PNTL kaer ona, mais na’in la iha, no la lori dokumentu mai reklama hodi justifika katak motór ne’e ninian, ho durasaun tempu ne’ebé determina ona, la mai foti sei halo leilaun,” informa Segundu Komandante Polisia Munisípiu Dili, Superintendente Asistente Polisia, Euclides Belo, ohin, ba jornalista iha Edifísiu Komandu Polisia Munisípiu Dili.
Prosesu leilaun ne’e Komandu Polisia Dili koordena ho Diresaun Nasional Patrimóniu Estadu (DNPE) maka halo rejistu depois deside tempu leilaun.
Euclides dehan, totál transporte públiku hirak ne’e kompostu hosi motór lubuk ne’ebé la serteza didi’ak totál númeru, inklui karreta barak rai butuk iha Komandu Dili halo ambiente ladún furak, tanba transporte hirak ne’e balun soke rahun rai kleur no para hamutuk de’it tanba kondisaun fatin kloot.
Nia hatutan, prosesu atu halo leilaun lei fó kompeténsia ba DNPE maka sei jere hodi redús transport labele para butuk okupa fatin sai kloot iha Komandu Dili.
Tuir observasaun jornalista Ajénsia TATOLI nota, motór no karreta barak rai butuk malu de’it no kesi ho korrente boot balun kondisaun aat tanba hetan asidente tráfegu no balun kondisaun di’ak, maibé na’in ba transporte la identifika klaru no transporte balun na’in la ba reklama tanba soke mate ema.
Jornalista : Eugénio Pereira
Editór : Francisco Simões
