DILI, 24 juñu 2019 (TATOLI)–Prokuradór Jerál Repúblika (PGR-sigla portugés), José da Costa Ximenes, esklarese polémika kazu inan soe bebé ba Prezidente Repúblika, Francisco Guterres Lú Olo.
Prezidente Repúblika rasik preokupa kazu inan feton ida ho inisia IP ne’ebé soe bebé iha loron 4 juñu, foin lalais ne’e, iha Aldeia Teka, Hudi Laran, Suku Lahane Osidentál, Postu Administrativu Vera Cruz, Munisípiu Dili.
Kazu ne’e rasik Ministériu Públiku no Tribunál Dili foti ona desizaun hodi husu Mário Nunes nu’udar ema ne’ebé hili bebé atu entrega fali bebé ba nia inan hodi bele kuidadu no fó susu ba bebé nu’udar direitu ida husi inan nian.
“Informa mós ba prezidente kona-ba polémika bebé ida ne’ebé nia inan soe hela. Ami informa ba Prezidente Repúblika katak, pozisaun Ministériu Públiku no Tribunál foti ne’e ho pozisaun ne’ebé loos para entrega fali bebé ba nia família,” hateten PJR José da Costa Ximenes ba jornalista, hafoin enkontru ho Prezidente Repúblika, ohin, iha Palásiu Prezidensiál, Dili.
José Ximenes dehan, Ministériu Públiku no Tribunál apresia inisiativa Mário Nunes, nu’udar sidadaun hodi hili bebé ne’e, maibé tuir loloos Mário tenke aprezenta keixa ba PNTL hodi labele hamosu fali problema hadau malu bebé entre família husi inan IP no Mário Nunes nian.
“Se señór ne’e (Mário Nunes) hetan labarik ki’ikoan ne’e, saida mak primeiru nia tenke halo? Nia devia informa ba polisia. Ita boot bele imajina de’it, se labarik bebé oan ne’e mak mate? Nia atu lori ka nia informa ba polisia?. Ida ne’e mós hanesan primeiru nia hetan bebé moris devia nia informa ba polisia depois mak polisia informa ba Ministériu Públiku,” esplika PJR José da Costa Ximenes.
Mário Nunes ne’ebé hili bebé ne’e entrega ona bebé ba nia inan IP hodi kuidadu bebé ne’e hodi obedese ba desizaun Tribunal Dili nian.
Jornalista : Eugénio Pereira
Editór : Francisco Simões
