DILI, 26 juñu 2019 (TATOLI) – Vise Prezidente Komisaun A Parlamentu Nasionál ne’ebé trata asuntu Konstitusionál no Justisa, Francisco de Vasconselhos, hateten, durante ne’e diskusaun públiku kona-ba projetu Lei Anti Korrupsaun (LAK) la’o hela. Maibé, agora Komisaun A suspende lai tanba membru Parlamentu Nasionál barak sei akompaña vizita Prezidente Repúblika nian ba Portugal.
Aleinde ne’e, iha loron 15 jullu mai ne’e, Parlamentu Nasionál mós tama ba resesu. Tanba ne’e, Deputadu Francisco de Vasconselhos esplika, Komisaun A suspende diskusaun públiku ba projetu lei refere ba semana rua ka semana tolu, hafoin kontinua fali diskusaun iha fulan Augusto, tinan ne’e.
Prezidente Repúblika, Francisco Guterres Lú Olo, sei halo vizita ofisiál ba Portugál hodi partisipa iha enkontru g7+ iha Lizboa, ne’ebé sei akompaña mós husi membru Parlamentu Nasionál.
“Diskusaun durante ne’e la’o nafatin, maibé tanba deputadu sira semana ida ne’e sei akompaña Prezidente Repúblika hodi halo viajen ba Lizboa hodi tuir enkontru g7+, nune’e mós iha loron 15 jullu, parlamentu tama ona ba resesu, entaun ita suspende semana rua ka tolu, hafoin kontinua diskute iha Augusto,” esplika Francisco de Vasconselhos, ba Ajénsia TATOLI, ohin, iha Parlamentu Nasionál.
Viajen deputadu sira ba Lizboa ho resesu membru parlamentu implika atrazu diskusaun projetu LAK, Deputadu Francisco de Vansconselhos, dehan, la’e, maske bele aselera LAK maibé labele husik oportunidade ida ne’e.
“Projesaun Komisaun A nian kona-ba projetu LAK ba tinan ida ne’e hotu ona, ida ne’e ita hakarak lais, maibé buat hotu labele luflafu, enkuantu ida ne’e liga ba ema nia direitu. Nune’e maka lei ne’e tenke diskute ho kle’an liuhusi rona opiniaun entidade sira ne’ebé ba futuru implementa lei,” esplika Francisco de Vasconselhos.
Projetu Lei Anti Korrupsaun iha artigu 100-resin no diskusaun ba lei refere to’o ona iha artigu 21.
Jornalista : Zezito Silva
Editór : Francisco Simões
