DILI, 26 juñu 2019 (TATOLI)—Ministru Defeza, Filomeno da Paixão de Jesus, sei halo hela análize ba proposta atu harii Autoridade Marítima.
Objetivu harii Autoridade Marítima atu kontrola rikusoin Timor nian iha tasi laran, tanba durante ne’e peska illegál barak mak na’uk ikan iha tasi Timor-Leste nian no mós sei tau-matan ba nesesidade seluk.
“Ha’u sei análize didi’ak lai. Ha’u sei haree no pontu balun ne’ebé ha’u bele kurije no hadi’a hotu mak ha’u aprezenta,” Ministru Filomeno Paixão, ko’alia ba jornalista sira iha Palásiu Governu, ohin.
Nia esplika, rikusoin sira presiza iha seguransa hodi asegura no proteje Timor-Leste nia tasi, tanba tasi Timor-Leste nian luan tebes. Nia haktuir prosesu atu estabelese Autoridade Marítima hotu ona liuhosi Gabinete Forsa 2020.
“Agora sa’e ona mai ha’u, atu hato’o mai Konsellu Ministru kona-ba formasaun sistema Autoridade Maritima. Autoridade Marítima sei tau iha Ministériu Defeza nia okos,” Filomeno haklaken.
Jornalista: Evaristo Soares Martins
Editór: Xisto Freitas
Lee mós notísia ne’e: http://www.tatoli.tl/2018/08/tl-presiza-autoridade-maritima-hodi-kontrola-tasi/
