GMPTL Serbisu Hamutuk Ho Sosiedade Sivíl Tau Matan Ba Feto ho Defisiente

DILI, 02 jullu 2019 (TATOLI)-Grupu Mulherés Parlamentár Timor-Leste (GMPTL-sigla portugés) serbisu hamutuk ho organizasaun naun governamentál (ONG) no sosiedade sivíl, atu oinsá haree inan feton ho defisiente sira no mós oan ki’ak ho feto maluk sira ne’ebé sai vítima iha funu laran.

“Atividade ne’ebé ami halo ba ita-nia feto maluk kbiit laek sira mak ami serbisu hamutuk ho ONG ho sosiedade sivíl sira atu oinsá bele haree ba maluk defisiente sira nune’e mós ba oan kiak ho ba feto maluk ne’ebé sai vítima iha funu laran,” hateten prezidente GMPTL, Lidia Norberta dos Santos Martins, ba Ajénsia TATOLI,ohin, iha Parlamentu Nasionál.
Deputada Lidia Norberta dos Santos Martins informa, durante tinan ida ho balun, GMPTL konsege halo atividade balun, maibe balun la konsege tanba deputada sira iha atividade barak iha li’ur no sira konsentrasaun iha reuniaun komisaun Parlamentár.
Too agora, Lidia Norberta hatutan, lei barak mak sei ideal liu tanba ne’e GMPTL sei haree mós ba ida ne’e no mós la’ós ba feto kbiit laek sira de’it.
“Ita iha avansu ne’ebé mak boot no susesu tebes tanba Iia sempre iha oin entre nivel rejionál nian no internasionál nune’e mós multilateral (CPLP) ne’e hatudu katak ita iha ona mudansa,” Deputada Lidia Norberta dos Santos Martins hateten.
Tuir Lidia Norberta, dezafiu boot feto sira ne’ebé asume knaar profisionál no pozisaun iha instituisaun ruma, maibé hanesan inan ida ba oan sira, nia mós iha knaar seluk hanesan responsabilidade ba família.
Jornalista : Osoria A. Marques
Editór : Francisco Simões

