DILI, 02 jullu 2019 (TATATOLI)-Diretór Finansas Polisia Nasional Timor Leste (PNTL), Superintendente Asistente, Basilio de Jesus, informa, daudaun ne’e parte aprovizionamentu PNTL hahú loke ona konkursu públiku ba kompañia sira atu fornese kombustivel ba Komandu PNTL.
“Agora foin iha faze konkursu, ita seidauk hatene kompañia ida ne’ebé mak sei manan,” informa Superintendente Asistente, Basilio de Jesus, ba jornalista, ohin, iha Kuartél Jerál PNTL ,Caicoli, Dili.
Basilio rekoñese durante ne’e membru PNTL sira atu hala’o atividade operasaun arraska ba kombustivel, tanba ne’e Komandu PNTL halo nafatin esforsu hodi fasilita serbisu operasaun unidade polisia hotu too komandu munisípiu sira.
Basilio esplika, konkursu ba kombustivel ne’e lori prosesu naruk, tanba ne’e afeta ba serbisu operasaun polisia.
“PNTL iha osan, mais ita tenke komprende ezekusaun osan husi rihun $200 mai kara’ik konkursu halo iha PNTL, se osan rihun $200 ba leten, konkursu halo Ministériu Interior, entaun konkursu hala’o lori tempu too fulan tolu liu afeta ba serbisu operasaun,” dehan Basilio.
Antes ne’e Komandu PNTL halo kontratu ho Kompañia Arzuma ne’ebé ninia kontratu termina ona iha 2018 no agora loke konkursu foun.
Jornalista : Eugénio Pereira
Editór : Francisco Simões
