DILI, 2 jullu 2019 (TATOLI)—Ministériu Obra Públika (MOP) liuhusi Ekipa Unidade Jestaun Projetu halo identifikasaun ona ba área risku ba erosaun no área rai inestável sira iha trosu projetu sira liliu projetu estrada Tasi Tolu-Tibar.
Ministru Obra Públika, Salvador Eugênio Soares dos Reis Pires, lidera ekipa Unidade Jestaun Projetu, ohin iha Tasi-Tolu, dehan identifikasaun ba projetu sira ne’e atu aprezenta solusaun detalladu atu rezolve problema projetu sira ne’ebé hasoru hela risku ba erosaun.
Nia esplika, solusaun sira hodi evita erosaun no rai inestável mak utiliza technologia envirotech no halo ona triál no aplika ba foho lolon ba trosu Tasi Tolu-Tibar ho sesaun purvolta metru 20.
“Benefísiu hosi technologia envirotech mak minimiza erosaun ba rai, prevene infiltrasaun bee ba rai-laran ne’ebé aumenta pezu hodi afeta rai halai, habelun-aan ba ambiente, fásil atu aplika no rezultadu imediatamente,” tenik Salvador liuhosi komunikadu impresa ne’ebé TATOLI asesu iha Portál MOP, ohin.
Molok ne’e, MOP kria ona ekipa hodi halo kontrolu ba projetu estrada sira hosi fundu impréstimu hodi garante kualidade projetu estrada sira.
Jornalista: Florensio Miranda Ximenes
Editór: Xisto Freitas
