DILI, 09 jullu 2019 (TATOLI)–Jurista timoroan husu ba governu Timor-Leste atu hatudu seriedade hodi próteze kazál timoroan lori droga.
Autoridade Indonézia, kuarta (29/05/2019), prende kazál timoroan ho inisiál JSP ho AS iha fronteira Mota-Ain, Belu, Timor Osidentál (NTT-sigla indonézia), bainhira lori droga atu ba fa’an iha Kupang.
Evidénsia ne’ebé autoridade Indonézia foti husi kazál timoroan ne’e, kompostu husi ai-moruk droga musan 4.874 ne’ebé tetu hamutuk grama 1,861.
Tuir Defensór Públiku, Sergio Quintas, enkuantu la hatudu seriedade sei difisil ba kazál timoroan nia destinu, tanba lei Indonézia aplika pena morte (hukuman mati) ba autór sira ne’ebé komete kazu droga.
Sergio Quintas, hateten, hanesan ema jurista nia sente triste uitoan, tanba rona deklarasaun husi governu katak ba kazu lori droga governu Timor-Leste labele intervein hodi husik de’it prosesu justisa tuir tribunal Indonézia nia desizaun.
“Ha’u husu atu próteze kazál timoroan lori droga ho seriedade no labele husik de’it ba ema nia prosesu justisa Indonézia nian,” hateten Sergio Quintas, ohin, ba jornalista sira iha Tribunal Distritál Dili (TDD).
Tuir loloos, tenik Sergio Quintas, governu Timor-Leste labele ko’alia uza razaun hodi deklara ba sosiedade sira katak Timor-Leste seidauk iha akordu estradisaun ho estadu Indonézia. Maibé, tenke buka dalan alternativu seluk ne’ebé posibilidade atu próteze kazál timoroan nia kazu.
Nia fó ezemplu, katak bainhira sidadaun estranjeiru barak mak komete krime ne’ebé ho natureza hanesan, maibé ema nia estadu liuhusi sira nia embaixada la tuur hakmatek atu buka kolabora ho instituisaun advokasia hodi próteze sira nia ema. Nune’e mós, afirma Sergio Quintas, kazu hanesan ba kazál timoroan, estadu Timor-Leste tenke liuhusi dalan diplomátiku oinsá koordena ho instituisaun advokasia Timor ho Indonézia buka defensór ka advogadu ne’ebé intelektuál lori ba próteze kazál timoroan ne’e.
“Ita labele uza razaun katak estadu rua seidauk iha akordu estradisaun tanba nee tenke husik de’it hodi labele buka solusaun. Ha’u hanoin governu iha mekanizmu barak, tempu polítika diplomátika iha mós dalan alternativu seluk, tanba antes iha tinan 2014 mós iha maluk Indonézia sira mai ho droga mós ita haruka fila. La’ós de’it kazu droga mas kazu seluk mós ita haruka fila, ne’e akontese, mas tanbasá timoroan na’in rua nee labele,” hateten Sergio Quintas.
Jornalista : Domingos Piedade Freitas
Editór : Francisco Simões
