DILI, 11 jullu 2019 (TATOLI)—Ministériu Obra Públika agradese ba Governu Koreia liuhusi Ajénsia KOICA ne’ebé hakarak apoiu instala planta enérjia renovável solár panél iha Postu Administrativu Ataúro, Munisípiu Dili.
Ministru Obra Públika (MOP), Salvadór Eugénio Soares dos Reis Pires, tenik apoiu ne’e aliña ho porgrama Oitavu Governu Konstitusionál ne’ebé hakarak investe iha enérjia renovável.
“Ita orgullu no agradese tebes ba ajudu hosi Governu no povu Koreia ne’e tanba ita-nia programa bele realiza,” dehan Ministru Salvador, ohin, iha edifísiu Ministériu Finansa, Aitarak-Laran, Dili.
Kona-ba orsamentu, governante ne’e dehan, sistema instalasaun ne’e finansia kuaze milliaun $2, ne’ebé hosi Governu Koreia pursentu 70 no Kompañia pursentu 30 inklui fó kapasitasaun ba ema lokál sira ho nia periudu ba tinan 10.
Salvador haklaken, liuhosi Embaixadór Koreia iha Timor-Leste, Lee Chin-Bum hamutuk ho Kompañia sira hosi Koreia hakarak investe duni iha enérjia renovável ka halo instalasaun planta produsaun enérjia renovável iha illa Ataúro.
Tuir ministru, sistema instalasaun uza Planta Photovoltaic ka PV ho kapasidade 6MW atu bele antisipa Governu Timor-Leste investe iha setór turizmu iha illa Ataúro.
Sistema instalasaun ne’e, tuir nia, la’ós sistema individualmente ka monta iha kada uma kain, maibé instala sentralizadu hodi prodúz enérjia mak foin bele fahe enérjia ba kada uma kain hotu iha illa Ataúro.
“Enérjia renovável ne’e sei uza loron matan, ne’ebé iha posibilidade atu koopera fuel cell no hydrogen atu haree frutasaun intensidade loron ba produsaun enérjia ho sistema Planta Photovoltaic ka PV,” katak membru governu ne’e.
Jornalista: Florencio Miranda Ximenes
Editór: Xisto Freitas
