DILI, 17 jullu 2019 (TATOLI)-Akadémiku Universidade Dili (UNDIL) konsidera katak bainhira Timor-Leste (TL) sai membru Organizasaun Sudezte Aziátika (ASEAN-sigla) sei akontese kompetisaun intelektualidade entre nasaun membru sira tanba ne´e rekursu umanu importante tebes ba TL.
“Ita tama ona ba ASEAN, ita tenke prontu atu simu, ema atu mai serbisu iha ita-nia nasaun, ita mós bele prepara aan atu ba serbisu iha ema nia nasaun, agora kestaun mak ita bele ou lae, tanba ne’e mak rekursu umanu ne’e sai nu’udar pontu importante ida, governu mós tenke haree,” hateten Dekanu Fakuldade Siénsia Polítika, UNDIL, Hugo Lorenço da Costa ba Ajénsia TATOLI iha Kampus UNDIL, Mascarenhas, Dili, kuarta (17/07/2019).
Nia esplika, ko´alia kona-ba kestaun demokrasia, iha organizasaun rejionál, Timor-Leste nia nível demokrasia di´ak liu.
Akadémiku ne´e reforsa mós katak, Timor-Leste sai membru ASEAN nian, papel akadémiku nian mak halo estudu viabilidade atu haree oportunidade. “Saida mak ita bele, ameasa ne´e saida, ba ita-nia adezaun bainhira ita ba ASEAN”.
Dekanu Fakuldade Siénsia Polítika UNDIL, Hugo Lorenço da Costa akresenta tan, polítika Timor-Leste nian hodi adere ba ASEAN, primeiru governu importante liu tanba, tuir nia, ita ko´alia kona-ba desizaun polítika externa, ita-nia vizaun oinsá atu lori nasaun ne´e, oinsá internasionaliza ita-nia nasaun, ne´e governu.
“Papel akadémika mak halo estudu di´ak tanba akadémika la halo buat ida; akadémika ne’e só haree husi ita-nia frakeza ne’e saida, se ita uja analiza atu hare’e kona ba ita-nia forsa ne’e saida, ita nia forsa ne’e iha ne’ebé, ita-nia frakeza saida mak ita iha, no haree ba ASEAN, oportunidade ne’e saida,” tenik dekanu ne´e.
“Entertantu, se ita ba ASEAN mak ita sai di´ak liután, entaun ne’e oportunidade. Se ita dehan ita-nia frakeza seidauk hadi’a, ezemplu ekonomia, entaun ita keta ansi,” konsidera akadémiku UNDIL ne´e.
Notísia relevante: http://www.tatoli.tl/2019/07/undil-organiza-seminariu-kona-ba-adezaun-tl-ba-asean/
http://www.tatoli.tl/2019/06/rezultadu-tour-mnek-ba-nasaun-membru-asean/
Jornalista: Nelia Fernandes
Editór : Rafy Belo
