DILI, 24 jullu 2019 (TATOLI)-Komisaun Reguladóra Arte Marsiál (CRAM-sigla portugés) sei koopera ho Polisia Nasionál Timor-Leste (PNTL), FALINTIL-Forsa Defeza Timor Leste (F-FDTL) ho mós autoridade lokál atu mobiliza malu, hamoos imajen no liafuan sira la kontribui ba pás no unidade ne’ebé riska iha parede sira iha públiku iha area Postu Administrativu Dom Aleixo, Munisípiu Dili.
Komisáriu ba Komisaun Reguladóra Arte Marsiál, Nelson M. Moniz Belo, hato’o planu ne’e, depois organiza enkontru ida ho autoridade seguransa hanesan Sentru Komandu Operasaun (CCO-sigla Portugés), Unidade Polisia Fronteira (UPF), Unidade Polisia Marítima (UPM), Konsellu Polisiamentu Komunitáriu (KPK), FALINTIL-FDTL, Xefe Suku no Administradór Postu Dom Aleixo, ohin.
KRAM ho ninia ekipa trasa programa ne’e, hodi garante Dili moos no livre hosi konflitu relasiona ho preparasaun ba komemorasaun tinan 20 loron konsulta popular 30 Agostu 1999-30 Agostu 2019.
Limpeza jerál ne’e tuir planu KRAM nia sei hahú implementa iha loron 26 jullu to’o 24 Agostu 2019 ne’ebé hahú uluk iha Suku Comoro, Dili.
“Loron komemorasaun ba konsulta populár mós besik ona entaun ami tuur hamutuk hodi koordena malu atu oinsá sentru kapitál ne’e moos hodi simu ita nia bainaka sira husi estranjeiru,” hateten Nelson M. Moniz Belo.
Tema hosi atividade limpeza jerál ne’e maka “Dili livre husi publisidade la-edukativu, moos no seguru” hodi kria estabilidade ba apoiu prosesu dezenvolvimentu nasionál.
Jornalista : Osória A.Marques
Editór : Francisco Simões
