Timoroan Tenke Kuda Nafatin Valór Moral no Kultura
DARE, 06 agostu 2019 (TATOLI)-Atu evita kazu soe bebé, la respeita malu, ódiu vingansa ba malu to’o oho malu, Bispu Dioseze Dili, Mgr. Virgilio do Carmo da Silva, SDB, husu atu Timoroan hotu tenke kuda nafatin valór moral no kultura.
Notísia Relevante : Família Xave Importante Halakon Kazu Soe Bebé
Soe Bebé, La Refleta Kultura TL
PNTL Detein Ona Suspeitu Soe Bebé iha Taibesi ho Suspeitu Oho Guilhermino iha Fatu-Ahi
Bispu Virgilio do Carmo da Silva, SDB salienta tan, meius prevensaun seluk atu evita kazu sira soe bebé maka reforsa edukasaun sívika no formasaun tenke hahú hosi família, komunidade no sosiedade.
“NGO barak-barak ne’ebé fa’an sira nia produtu oi-oin no promosaun oi-oin katak ida ne’e saudavel, uza kondom hodi halo relasaun sexuál no halo buat hotu no fó osan atu halo promosaun ba sira nia produtu, maibé timoroan maka sofre tanba estraga timoroan ninia kultura no identidade,” hateten Bispu Virgilio do Carmo da Silva, ohin, ba jornalista sira iha Dare.
Bispu Virgilio afirma, papél inan-aman iha uma laran importante atu oinsá kontinua fó edukasaun di’ak no hanorin moral hodi akompaña sira nia lala’ok tomak hodi evita aan hosi atividade ransu livre.
“Timoroan hotu tenke hola konsiénsia atu oinsá prevene aan hosi hahalok relasaun sexuál livre hodi evita kazu soe bebé,” tenik Dom Virgilio do Carmo da Silva, SDB.
Bispu dehan, la fasil atu halo prevensaun ba kazu soe bebé maibé Timoroan ida-idak tenke hola konsiénsia atu promove valor moral iha família no haburas nafatin kultura sira ne’ebé bele ajuda ema atu prevene ona kazu soe bebé.
“Inan aman sira mós tenke iha responsabilidade boot atu hatene kondisaun no situasaun oan sira ninian no mós nu’udar oan ita tenke hatene rona no obedese inan aman,” hateten Dom Virgilio hodi espresa tan nia laran susar haree kazu soe bebé ne’ebé akontese beibeik iha Dili laran.
Jornalista : Agapito dos Santos
Editór : Francisco Simões
