DILI, 13 agostu 2019 (TATOLI)–Komisaun Anti Korrupsaun (CAC-sigla portugés) servisu hamutuk ho instituisaun anti korrupsaun hosi Hongkong, oferese formasaun ba iha funsionáriu sira KAK nian, hodi bele hala’o servisu ho rigor no di’ak atu kombate korrupsaun no promove boa governasaun iha instituisaun estadu.
Komisáriu KAK, Sergio Hornay hateten, KAK sei hala’o formasaun kontinuasaun ba prevensaun korrupsaun ba kuadru espesialista anti korrupsaun nian.
Formasaun ne’e lori peritu hosi instituisaun KAK Hongkong nian hodi fahe sira nia matenek no esperiénsia ba iha funsionáriu KAK sira. “Ha’u hanoin iha formasaun nee, atu ita eleva kuadru espesialista anti korrupsaun liuliu diresaun prevensaun no sensibilizasaun nia koñesimentu,” hateten Sergio Hornay, ohin, iha Otél Ramelau, Dili.
Nia hatutan, formasaun ne’ebé mak peritu KAK halo loron ida nee, liuliu oinsá atu ajuda funsionáriu sira hodi bele fó tulun ba iha setór públiku no privadu liuliu ba servisu kontratasaun aprovizionamentu hodi bele minimiza poténsia ba iha korrupsaun.
Komisáriu KAK nee mós esplika katak, KAK nia knaar rua mak importante kona ba prevensaun no investigasaun kriminál. Tanba ne’e, ba prevensaun ninian buka forma hot-hotu, oinsá mak KAK bele halo akonsellamentu, rekolla informasaun ne’ebé mak iha ligasaun poténsia ka pratika ne’ebé mak halai ba iha krime korrupsaun nian.
Materia sira ne’ebé mak sei ko’alia iha loron tolu formasaun KAK nian ne’e mak hanesan dezenvolvimentu institusionál, servisu aprovizionamentu no integridade ba iha kuadru KAK nian.
Finalidade husi treinamentu ida nee, hakarak kompleta programa sira ne’ebé halo iha tinak kotuk liuliu iha tinan 2019.
Partisipa iha semináriu nee mak hanesan Komisáriu KAK, Sergio Hornay, Komisáriu Adjuntu ba Prevensaun no Sensibilizasaun, Luis Oliveira Sampaio, Komisáriu Adjuntu ba asuntu Serbisu no Kooperasaun nian, Alex Faustino Freitas.
Jornalista : Domingos Piedade Freitas
Editór : Francisco Simões
