DILI, 19 agostu 2019 (TATOLI)- Feto timoroan ida ho naran inisiál AX sofre moras tumor besik iha fuan, ne´ebé durante ne’e hala’o tratamentu saúde fulan ida iha Klínika Bairru-Pite, Lanud, Dili, tanba la passa ho ai-moruk, bainrua kuarta (21/09/2019) sei aranka ba Austrália atu halo operasaun ba nia saúde. Pasiente inisiál AX ne´e ho idade 30 husi Munisípiu Lautem.
“Pasiente ne’e ami Klínika Bairru Pite mak deteta nia moras no nia hetan moras tumor besik iha fuan tanba ne’e mak ami serbisu hamutuk ho doutór espesialista sira husi Carlite Surgeon Australia no mós servisu hamutuk ho ONG Maluk Timor hodi haruka pasiente ne’e ba Austrália hodi halo tratamentu saúde,” hateten dr. Francisco Higino Freitas ba Ajênsia TATOLI iha nia kna’ar fatin, Klínika Bairru-Pité, ohin.
Médiku timoroan ne´e informa, Klínika Bairru-Pité serbisu hamutuk instituisaun tolu, rua iha Timor-Leste (Maluk Timor ho East Timor Heart Fund), ida iha Austrália (Carlite Surgeon Australia, Melbourne).
“Ami deside ona atu haruka pasiente ba no sira mai cek hotu ona dehan pasiente ne’e hetan moras tumor besik iha fuan no sira dehan; prontu ami lori nia ba halo tratamentu iha Austrália no ami haruka enfermeira ida husi Klínika Bairru-Pité mak akompaña pasiente ba halo tratamentu saúde,” nia dehan.
Nia relata, fundu ne’ebe atu lori pasiente ba Austrália sira husi Asia Fundation, husi Austrália nian, servisu hamutuk ho Organizasaun Naun Governamentál (ONG) Maluk Timor no mós inklui Klínika Bairru Pite no klínika ne´e halo kooperasaun di´ak ho doutór espesialista Austrália nian.
“Ami iha kooperasaun di´ak hotu ba instituisaun se de´it, governu nian no naun govermentál nian hanesan ezemplu ONG Maluk Timor, ami servisu hamutuk iha ne’e sira mós kaer programa halai liu ba fuan nian no ami iha ne’e mós deteta pasiente moras fuan nian barak. Tanba ne’e mak ami servisu hamutuk ho di´ak tebes,” haktuir médiku timoroan ne´e.
Médiku ne´e esplika, pasiente ne’ebé durante baixa iha Klínika Bairru Pite ne’e kauza husi me´ar ran, isin tun. “Ami hanoin iha moras tubercolose (TBC) tanba ne’e mak ami halo teste uluk kabeen tasak negativu no ami halo nia raiu-X depois doutór espesialista sira husi Austrália cek mak pasiente ne’e sofre tumor besik iha fuan tanba ne’e mak sira koopera ho ami atu lori pasiente ne’e ba halo tratamentu saúde”.
“Moras tumor ne’e kauza husi jénetika ita ema idaidak, ninia impaktu ne’e husi fuma sigaru, mama malus sira ne’e; bele kauza mós ba moras fuan,” klarifika dr. Francisco Higino Freitas.
Médiku timoroan ne´e reforsa tan, prevensaun ba moras sira ne´e la´ós klínika maibé husi ita idaidak nian. “Tenke redús ema fuma no ema mama sira no fó mos promosaun ba komunidade sira atu redús fuma no mama,” friza médiku Francisco Higino hodi konsidera mós apoiu governu ba sensibilizasaun kona-ba prevensaun ne´e.
Entretantu, iha biban hanesan, Klínika Bairru Pite agradese tebes ba apoiu sira husi espesialista Austáalia sira ne’ebé apoiu ona timoroan atu ba halo tratamentu saúde iha Austrália.
Jornalista: Felicidade Ximenes
Editór : Rafy Belo
