DILI, 26 agostu 2019 (TATOLI)-Diresaun Nasionál Rejistu no Notariadu, Ministériu Justisa ho Organizasaun Noun Governmental (ONG)World Vision Timor-Leste, oferese ona sertidaun moris RDTL (Republica Democratica de Timor-Leste) ba labarik ho idade 0-5 hamutuk 1.414 iha Suku Gariuai, Buibau no Salamari, Postu Administrativu Baucau Vila, Munisípiu Baucau.
Notísia Relevante: Labarik 368 iha Gariuai Rejistu Moris
Diretór Jerál Servisu Rejistu no Notariadu, Crisogno da Costa Neto, informa, ekipa halo ona rejistu moris ba labarik sira husi Suku tolu iha Munisípiu Parte Leste ne’e, durante semana kotuk.
“Ekipa Ministériu Justisa ho World Vision Timor-Leste halo ona rejistu ba labarik moris iha suku tolu, mak hanesan iha Gariuai hamutuk 370, Suku Buibau (567) ho Samalari ba labarik na’in 481,” informa Diretór Jerál, Crisogno da Costa Neto, ohin, liuhusi kontaktu telefone ba Ajénsia TATOLI.
Notísia Relevante: Semana Oin, DNRN-World Vision Hahú Rejistu Labarik
Tuir oráriu ekipa rejistu iha loron 26-27 agostu, sei halo rejistu hanesan iha Suku Uailili depois iha loron 28-29 sei kontinua dezloka ba Suku Trilolo.
Alende iha Baucau, Diretór Jerál Servisu Rejistu no Notariadu, Crisogno da Costa Neto, informa, ekipa ida husi DNRN no World Vision iha loron 27 agostu 2019 sei dezloka ba Munisípiu Aileu hodi rejistu iha Suku Aileu Villa, Laulara no Suku Hitu seluk.
Jornalista : Agapito dos Santos
Editór : Francisco Simões
