DILI, 27 agostu 2019 (TATOLI)— Prezidente Parlamentu Nasionál, Arão Noé de Jesus da Costa Amaral, konsidera desizaun Tribunál Rekursu laiha konsisténsia, maski nune’e troka nota entre Timor-Leste no Austrália iha 30 agostu la’o nafatin.
Arão dehan, Parlamentu Nasionál simu ona desizaun Tribunál Rekursu ba Lei Atividade Petrolífera no Lei Fundu Petrolífera ne’ebé Prezidente Repúblika husu konstitusionalidade.
Lee mós: Tribunál Rekursu Deklara Inkonstitusionalidade ba Alterasaun LFP-LAP
‘’Lamenta tanba desizaun Tribunál Rekursu nian ne’e laiha konsisténsia ho desizaun uluk liga primeira alterasaun Lei Atividade Petrolífera hodi foti millaun $650 hodi sosa asaun kompañia ConocoPhilips ho Shell nian ne’e la inkonstitusionál. Agora ba asuntu hanesan mak deklara fali inkonstitusionál ne’e mak dehan laiha konsisténsia. Troka nota sei la’o nafatin, tanba determinante mak lei rua ne’ebé promulga ona no tratadu ne’ebé publika ona ne’e. Parlamentu Nasionál hein desizaun Prezidente Repúblika nian ba asuntu ne’e depois mak Parlamentu Nasionál foti desizaun saida mak atu halo’’, dehan nia ba Agência TATOLI via telefónema, tersa ne’e.
Nia haktuir, Tribunál Rekursu deklara inkonstitusionál ba artigu 22 no artigu 9 kona-ba Lei Atividade Petrolífera ne’ebé autoriza Timor Gap, Ep, bele aplika diretamente ba operasaun petrolífera iha territóriu nasionál ka estranjeiru, liuhosi selebrasaun transaksaun komersiál liuhosi Timor GAP, Ep, tuir artigu 15 A lei númeru 9/2005.
Arão esplika, Tribunál Rekursu deklara inkonstitusionalidade ba artigu 139 nú. 1, 2 no 3, maibé artigu seluk lae.
Jornalista: Evaristo Soares Martins
Editór: Xisto Freitas
