DILI, 09 setembru 2019 (TATOLI) – Ministériu Edukasaun Juventude no Desportu (MEJD) aprezenta ona Orsamentu Jerál Estadu (OJE) 2020 ho montante millaun 86 USD ba Ministra Finansa hodi bele realiza no asegura planu prioridade lima ne’ebé mak MJED planeia tiha ona.
Planu prioridade lima ne’e mak hanesan infraestrutura, jestaun eskolár, formasaun língua portugeza ba profesór sira, inkluzaun no apoiu materiál didátiku ba profesór sira.
Iha enkontru Komisaun Revizaun Orsamentu Polítika (KROP) ne’ebé hala’o iha edifísiu Ministériu Finansas, ohin, Ministra Dulce de Jesus Soares hateten ba jornalista sira katak maske orsamentu MEJD nian prevee ona maibé kona-ba infraestrutura nian sira sei harii fali ekipa ida hodi hasoru malu fali ho Ministériu Finansa atu halo esplikasaun ho di’ak liután.
“Ami sei iha tan orsamentu separadu ida kona-ba infrastrutura nian tanba ita hotu hatene katak 2020 infrastrutura sai prioridade boot ba MEJD nian,” hateten Ministra Dulce de Jesus perante mídia sira.
Komisaun Infrastrutura Separadu MEJD nian sei halo fali aprezentasaun hodi bele garante planu prioridade sira ne’e hodi aselera progresu ba eskola sira ne’ebé mak to’o agora sei problema hela.
Enkuantu, Programa formasaun ba profesór sira, Ministra Edukasaun , Dulce de Jesus Soares informa katak hetan ona apresiasaun husi Ministériu Finansa (MF) rasik tanba ne’e MF sei tau millaun 10 USD ba pakote fiskál atu aselera programa formasaun nian.
Notísia relevante:MEJD Prioritiza Infraestrutura no Jestaun Eskolár iha OJE 2020
Jornalista : Tomé Amado
Editór: Rafy Belo
Apiou ba plano suporta tebes.. maibe muda sistema nebe hanesan pontualidade no tau matan mos ba manorin neebe oferese nia an sai voluntario ba tinan naruk hakarak kontribui ba rai doben nee maibe governu la tau matan. Tan deit hadomi ami nia vokasaun la manan osan sempre haraik aan loos maibe tinan ba tinan mudansa la iha tinan mos aumenta ba bei beik