DILI, 11 setembru 2019 (TATOLI) – Atu fasilita diskusaun Komité Revizaun Orsamentu Polítika (KROP) ba Orsamentu Jerál Estadu (OJE) 2020 ho di’ak no tuir kalendáriu maka KROP estebelese grupu tékniku rua.
Ekipa tékniku rua ne’e hanesan grupu tékniku ba polítika kapital dezenvolvimentu no grupu tékniku ba Fundu Dezenvolvimentu Kapitál Umanu (FDCH).
“Diskusaun hahú kedas ba iha loron 9, iha estratéjia oioin mak ami uza nune’e bele finaliza tuir kalendáriu ne’ebé iha katak sei finaliza iha loron 21 fulan ne’e. Tanba ne’e mak KROP halo fali estratéjia ida katak fahe fali ba parte rua nune’e iha diskusaun bele la’o ho di’ak”, Diretór Nasionál Orsamentu Estadu Ministériu Finansa (MF), Salomão Yoaquim, hatete iha Aitarak-Laran, ohin.
Nia dehan aléinde KROP, iha mós grupu tékniku ne’ebé mak halo diskusan no haree loos de’it ba proposta adisionál sira ne’ebé mak iha hafoin haruka fali ba KROP ne’ebé prezide husi Primeiru-Ministru, Taur Matan Ruak.
Nune’e mós grupu tékniku ba Kapitál Dezenvolvimentu ne’ebé liga liu ba projetu PDN, projetu mai husi liña ministériu sira, Fundu Infraestrutura, no sira ne’ebé iha relasaun ba polítika Governu Daualuk nian.
Notísia relevante : MF Realiza Reuniaun KROP Durante Semana Rua
Jornalista : Antónia Gusmão
Editora : Maria Auxiliadora
