DILI, 16 setembru 2019 (TATOLI)- Komandu Polisia Nasional Timor-Leste (PNTL) hala’o promosaun diviza poor antiguidade ba Inspetór Asistente, Francisco Pinto no Armindo Pinto ho Postu Inspetór.
Promosaun diviza ne’e hala’o bazeia ba despaxu nu.237/CG-PNTL/IX/2019 hodi konsidera katak kompeténsia ne’ebé fó ba Komandante Jerál PNTL iha termu alínea h no.3 artigu 10 husi dekretu lei nu.09/2009, iha loron 18 fulan Fevereiru, ne’ebé aprova kona-ba Lei orgánika PNTL nian.
Komunikadu imprensa ne’ebé Ajénsia TATOLI asesu husi Komandu PNTL, ohin, haktuir katak, lista promosaun antiguidade husi diviza Asistente Inspetór ba diviza Inspetór ne’ebé organiza husi Departamentu Rekursu Umanu Komandu Administrasaun PNTL, artigu 31 rejime promosaun.
Alende ne’e haree ba satisfasaun, nesesidade no interese iha servisu Polisia nian hodi kumpre ejijénsia no regulamentu ne’ebé iha.
Inspetór Jerál Superintendente Xefe, Carlos Jeronimo, hateten, promosaun diviza ba Postu Inspetór ne’e hanesan konfiansa instituisaun nian ba promovidu na’in rua (2) maske promosaun poor antiguidade ne’e hanesan fiar ne’ebé komandu fó,” dehan Carlos liu husi diskursu iha Kuartél Jerál PNTL, Caicoli, Dili.
Nia haktuir tan, iha tempu kotuk membru polisia rua ne’e ho postu Inspetór Asistente ne’ebé hala’o knaar hanesan médiku, maibé ohin ba oin responsabilidade aumenta ida ne’e atu hateten katak servisu ne’e sei todan ba beibeik.
“Ne’e konfiansa husu ba sira atu servisu didi’ak, servisu ho ekipa fó liman ba malu hamutuk atu nune’e ita boot sira bele hala’o servisu ho di’ak,” nia hatete.
Nia dehan, servisu nu’udar médiku no doutór sira ne’e nia servisu todan tanba Instituisaun PNTL nia membru sira moris saudavel hodi hala’o servisu ne’e no doutór sira iha nia responsabilidade boot atu ajuda no fó apoiu atu nune’e sira mós bele isin di’ak hodi hala’o servisu.
Promosaun diviza ne’e hanesan promosaun diviza poor antiguidade ba dala ikus, fó hanoin katak iha aniversáriu PNTL ba dala-19 iha loron 27 Marsu, Komandu PNTL fó promosaun diviza poor antiguidade ba inspetór asistente na’in rua ba postu Inspektór, sarjentu na’in 540 ba Postu Primeiru Sarjentu no Ajente na’in 236 ba postu Ajente Prinsipál.
Serimónia promosaun diviza poor antiguidade ne’e dirije husi Inspetór Jerál no partisipa husi Diretór Rekursu Umanu Superintendente Asistente Emilio dos Santos, Xefe Departamentu Justisa Superintendente Antonino Mauluta, Xefe Klínika Saúde PNTL Inspetór Marcelina Eugenia, Sarjentu no ajente sira.
Jornalista : Eugénio Pereira
Editór : Francisco Simões
