DILI, 16 setembru 2019 (TATOLI)- Hahú ohin dadeer, Komandu Polisia Munisípiu Dili halo operasaun hodi prende transporte públiku hanesan bis, angguna no karreta baskulante sira ne’ebé hala’o viajen husi munisípiu mai Dili para arbiru la tuir regra.
Segundu Komandante PNTL Munisípiu Dili, Superintendente Asistente Polisia, Euclides Belo, informa, programa ho naran “Operasaun Dixiplina” ne’e atu fó edukasaun ba motorista sira ne’ebé lori bis tenke para iha de’it terminál ka fatin estasionamentu ne’ebé prepara ona iha Merkadu Becora, Merkadu Taibesi no Tasi Tolu nian.
“Ami halo “Operasaun Dixiplina” atu kontrola it nia motorista sira liu-liu sira ne’ebé lori bis, trek no angguna atu para de’it iha Terminál Becora, Taibesi no Tasi Tolu, tanba bis mai husi foho labele mai para arbiru fali tama too sidade Dili. Ne’e la bele,” informa Euclides Belo ba jornalista iha Komandu PNTL, Caicoli, Dili.
Bis ne’ebé PNTL prende, ohin, pertensia ba Munisípiu Lautem nian hamutuk lima (5), tanba para arbiru la kumpre regra sinais tránzitu ne’ebé Diresaun Nasional Transporte Terrestre (DNTT) fó sai ona.
Tuir lei, bainhira transporte ida para arbiru sei selu koima ba estadu iha banku BNU depende ba billete infrasaun ne’ebé parte polisia tránzitu identifika iha terrenu.
Komandu PNTL aviza ba mós kondutór bis ho angguna sira bainhira tula pasajeiru ka sasán tenke sukat karreta nia forsa no la bele tula ema la tuir regra hodi evita mosu asidente tráfegu.
Jornalista : Eugénio Pereira
Editór : Francisco Simões
