DILI, 18 setembru 2019 (TATOLI) – Prokuradór titular husi Ministériu Públiku (MP) rekoñese too oras ne’e parte Tribunal seidauk haruka karta notifikasaun kona-ba desizaun kazu Vera.
Notísia Relevante : Kazu Oho Vera, Tribunál Absolve Arguidu Na’in Haat
Prokuradór ne’e hatete, tuir loloos depois desizaun tribunal haruka kedas notifikasaun ba MP haree prosesu, nune’e bele halais prosesu kuandu atu halo rekursu.
“Ita boot sira sei lembra desizaun liu semana hira ona, maibé Ministériu Públiku, seidauk simu notifikasaun husi tribunal ba kazu Vera nian, se haruka mai ami halo rekursu,” hateten prokuradór titular ne’ebé rezeita públika nia naran ba jornalista sira iha Tribunal Distritál Dili (TDD), tersa (17/09/2019).
Notísia Relevante : Kazu Oho Vera, PNTL Sei Halo Konfirmasaun
Nia dehan, parte Ministériu Públiku la hein tan ona notifikasaun husi tribunal, maibé Ministériu Públiku mak haruka fila fali karta ba tribunal kona-ba kazu ne’e, hodi hatete katak atu halo rekursu.
Prokuradór titular sei lembra desizaun ne’ebé juis delibera katak juis adjuntu nain rua la asina karta provas leitura ba kazu ne’e, maibé juis prezidente kontinua lee desizaun. Tanba ne’e, haree ba sira ne’e hotu, MP kaer hanesan faze fundamentu dalan ba rekursu nian.
“Ita boot sira sei lembra ka lae, momentu juis lee sai provas leitura, hatete katak juis adjuntu sira seidauk asina maske delibera hamutuk, tanba ne’e ho buat sira ne’e sai fundamentu ba ami atu halo rekursu,” Prokuradór nee hateten.
Jornalista : Domingos Piedade Freitas
Editór : Francisco Simões
