DILI, 24 setembru 2019 (TATOLI)- Ministru Defeza no Ministru Interior Interinu, Filomeno da Paixão de Jesus, aprezenta ona proposta ida ba Primeiru-Ministru Taur Matan Ruak, atu haree prosesu aplika lei rigorozu hasoru grupu ilegál sira ne’ebé estadu taka ona, maibé kontinua treinu no hamosu krime organizadu iha Timor-Leste.
Notísai Relevante : Semana Ne’e, PNTL Kaptura Ema Na’in 16
Ministru lamenta grupu ilegál sira ne’e ba tuir treinu no juramentu iha rai li’ur hodi sa’e sabuk no fila mai Timor-Leste kontinua halo intimidasaun no ameasa malu iha média sosiál Facebook hodi halo situasaun kada fulan mosu beibeik krime.
“Ha’u hakerek ona proposta ba Primeiru-Ministru, atu hola medida ne’ebé sériu uitoan, tanba kuandu ita mamar problema mais nunka hotu,” afirma Ministru Filomeno da Paixão de Jesus, hodi responde jornalista sira, ohin, iha Timor Plaza, Dili.
“Ha’u la dehan atu tiru mate ou lae, tanba aproximasaun ida ne’ebé ita halo beibeik ne’e too agora ne’e la di’ak ona, agora ita tenke halo aproximasaun seluk para muda situasaun,” hateten Ministru Filomeno Paixão.
Antes ne’e, Komandante Komandu Polisia Munisipiu Dili, Superintendente Xefe Armando Monteiro, deklara, durante semana ida ne’e nia laran, Polisia Munisipiu Dili konsege kaptura suspeitu na’in 16 ne’ebé envolve iha kazu krime ne’ebé akontese iha kapitál Dili.
Husi suspeitu na’in 16 ne’e, PNTL kaptura mós suspeitu prinsipál balun ne’ebé envolve direita iha kazu taa kanek joven na’in tolu hanesan, JJ, AB no JC iha área Beto Leste, Bai Leste, Suku Madohi, Postu Administrativu Don Aleixo no Suku Bebonuk parte Tasi Ibun nian iha domingu (15/09/2019).
Jornalista : Eugénio Pereira
Editór : Francisco Simões
