DILI, 24 Setembru 2019 (TATOLI)-Ministru Defeza no Ministru Interior Interinu, Filomeno da Paixão de Jesus, fó ona orientasaun ba Komandu Polisia Nasional Timor-Leste (PNTL) atu buka tuir suspeitu ne’ebé oho vítima Ivon da Silva (22) hodi kaptura no lori ba prosesa iha tribunál.
Ministru lamenta kazu omisídiu ne’ebé akontese iha Aldeia Postu Penál Ai-Mutin, Suku Comoro, Dili, nu’udar dezastre ida ne’ebé ema hotu la espera atu akontese, no kazu ne’e atu fanun polisia halo vijilánsia metin iha kapitál Dili.
“Agora tenke buka suspeitu sira ne’e para kaer hotu, ne’e ita lahalimar tanba ne’e krime organizadu,” afirma Ministru Filomeno ba jornalista, ohin, iha Timor Plaza, Dili.
Nia dehan, governu rasik hakfodak, tanba akompaña ema rihun ne’ebé ba partisipa misa, rona mensajen husi bispu sira, ikus atu fila ba idak-idak nia uma mosu fali dezastre iha dalan klaran, mezmu PNTL asegura ona seguransa ba grupu Arte Rituál Kolimau 2000.
“Polisia atua situasaun, maibé ema la espera ba misa inaugura gruta hotu- hotu ba taka liman reza iha ne’ebá hakaruk, afinál sai mai oho malu kedas. See maka espera ida ne’e,” Filomeno Paixão preokupa.
Biban ne’e, Komandante Operasaun Nasionál Polisia, Superintendente Xefe Pedro Belo, dehan, PNTL kontinua asegura seguransa iha Ai-Mutin inklui fatin seluk hodi evita kontinuasaun problema labele akontese.
Pedro kontra kronolojia kazu ne’e akontese, tanba mosu provokasaun tolok husi masa Grupu Kolimau 2000 hasoru membru polisia no komunidade sira iha estrada ibun, too ikus mosu konflitu iha Ai-Mutin nian.
“Sira liubá dalan iha karreta laran tolok, ikus mai mosu provokasaun tuda malu,” Pedro esplika.
Nia dehan, PNTL kontinua hametin seguransa iha sikun-sikun sira sidade Dili para evita konfrontu entre grupu ilegál sira.
Jornalista : Eugénio Pereira
Editór : Francisco Simões
