iklan

DILI, MUNISÍPIU

Bispu Norberto Sei Ko’alia Ho Embaixadór Portugál Hadi’a Sistema Trata Sertidaun

Bispu Norberto Sei Ko’alia Ho Embaixadór Portugál Hadi’a Sistema Trata Sertidaun

Prezidente Konferénsia Episkopál, Bispu Don Norberto Amaral. Imajen/Tatoli.

DILI, 26 Setembru 2019 (TATOLI) – Prezidente Episkopál Timor-nian, Bispu Norberto Amaral, hatete sei hasoru embaixadór Portugál hodi aprezenta preokupasaun Igreja nian atu hadi’a sistema atendimentu trata sertidaun ba sarani sira ne’ebé hakarak hetan Billete Identidade (BI) no pasaporte Portugál nian.

Bispu Norberto Amaral dehan Igreja preokupa tanba sarani barak ba ronava naran iha sertidaun tuir fali sistema Portugál nian para hetan BI no Pasaporte Portugál para ba buka servisu iha rai li’ur.

Bispu dehan tan dala ruma sarani sira ba Igreja atu renova sira nia sertidaun moris, inklui inan aman sira nia sertidaun, no sertidaun kazamentu la’o arbiru hodi husu  renova naran apelidu la’o tuir fali sistema Portugál nian, tanba sertidaun avó sira ne’ebé mate ona tau naran jentiu mós presiza renova naran tau fali naran sarani nian hodi hamosu komplikadu.

“Tanba de’it husi Embaixada Portugál ezije loos kondisaun hirak ne’e hodi tau iha ne’ebá, maibé ita haree didi’ak ne’e buat sira ne’e la’o la tuir lei kanónika haruka, dala ruma tama iha kartóriu arbiru de’it, tanba kartóriu ne’e rai dokumentu ofisiál ka segredu Igreja nian, ne’ebé ita ko’alia para hadi’a sasán sira ne’e”, afirma Bispu foin lalais ne’e iha ministériu finansa, Aitarak-laran.

Nia hatutan Igreja la bandu no taka dalan ba sarani sira atu hetan sertidaun, maibé Igreja hakara ko’alia ho embaixada Portugál para hadi’a sistema, nune’e joven ida ba trata sertidaun batizmu, no inan aman sira nia sertidaun inklui hadi’a naran iha sertidaun tenke tuir regra Timor-Leste nian.

“Ezijénsia ida ne’ebé makaas loos mak obriga joven sira atu halo sertidaun ou dokumentu presiza oan nia naran tutun hanesan ho nia aman ka inan nian ne’e imposivel, tanba ne’e nasaun Timor-Leste la’ós Portugál para oan nia naran apelidu ne’e tenke tuir nia aman, tanba iha Timór bainhira sarani tau naran nia tutun ne’e bele mós foti nia aman ka inan sarani nian. Pratika sira ne’e akontese tiha ona husi parte Igreja mós monu, entaun agora Igreja Katólika esforsu atu ko’alia fali ho Embaixada Portugál hodi hatuur buat sira ne’e ho didi’ak”, tenik nia.

Durante ne’e iha Timor-Leste mosu problema tanba de’it atu muda naran, dala ruma padre no katekista sira simu todan, tanba hetan hirus husi joven balun lees sertidaun no harahun vidru uma kreda nian, Amu Bispu haktuir.

Jornalista: Eugénio Pereira

Editora: Rita Almeida

iklan
iklan

One Comment

Leave a Reply

iklan
error: Content is protected !!