DILI, 9 outubru 2019 (TATOLI) – Prezidente Federasaun Voleiból Timor-Leste (FVTL), Inocêncio Araújo da Silva informa, tinan ne’e, sira iha orsamentu atu realiza Liga Voleiból maibé ba de’it Primeira Divizaun.
Nia dehan, Liga tinan ne’e hala’o tanba parte FVTL dirije ona proposta ba Sekretaria Estadu Juventude no Desportu iha ne’ebé aprova ona orsamentu hamutuk rihun $75.
“Ita hanoin katak iha 3 outubru liubá ne’e Liga bele hala’o ona, maibé sei iha kestaun balun ita diskute ho parte Diresaun Desportu hosi Sekretaria Estadu Juventude Desportu nian entaun sei iha hela prosesu nia laran,” tenik Inocêncio ba Agência Tatoli iha Jináziu Dili, kuarta ne’e.
Lee mós: Liga Voleiból Paradu Tinan Rua Ona
Nia subliña, FVTL mós sei haree ba kampu alternativu ne’ebé mak bele hala’o Liga tanba kampu ne’ebé atu hala’o jogu sei iha hela faze reabilitasaun.
“Kona-ba kampu nian mak ita sei diskute hela ho Diresaun Nasionál Desportu atu haree kampu alternativu. Liga ne’e ita tenke hala’o. Se la hala’o bele fó impaktu ba foinsa’e sira-nia talentu iha voleiból indór,” nia haklaken.
Maski ho osan ne’ebé seidauk sufisiente, Inocêncio informa, parte Liga sei buka meiu oinsá bele realiza duni Liga.
“Bele osan uituan mós ita tenke buka meiu para hala’o. La’ós dehan osan barak de’it mak ita hala’o. Todan uituan maibé ha’u ko’alia ona ho parte tékniku hanesan árbitru sira katak saida mak ita iha hodi dezenvolve Liga iha Timor ita tenke fó sakrifísiu no tempu hodi kontribui,” nia subliña.
Entretantu, iha tinan 2018, Liga la la’o tanba impaktu hosi impase polítika ne’ebé Timor-Leste hasoru.
Klube voleiból ne’ebé daudaun ne’e rejistu iha FVTL hamutuk 22 kompostu hosi mane no feto.
Jornalista: Hortençio Sanchez
Editór: Xisto Freitas
