DILI, 22 outubru 2019 (TATOLI) – Operadór Ekonómiku sira konsidera atividade inspesaun ne’ebé hala’o hosi Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA) bele ajuda hodi kontrola sasán atu labele fa’an produtu sira liu prazu.
Na’in ba Kioske Hadedep Enin, Ermelinda da Silva, hateten maske nia maka na’in ba kioske maibé nia rasik la kontrola sasán ne’ebé fa’an, tanba mesak no laiha ema ida ajuda. Entaun, ho prezensa AIFAESA nian bele ajuda ona nia hodi asegura di’ak liután sasán, nune’e labele fó fali moras ba ema seluk ne’ebé bá sosa.
“Sira-nia prezensa ne’e di’ak tebes ba ami negosiante sira, tanba dala barak ami ladún kontrola sasán sira ne’e, maibé ho dalan ida hanesan AIFAESA ne’e fó hanoin ba ami katak ba oin ne’e tenke kontrola, labele fa’an sasán liu prazu, ne’e bele prejudika ba ita-nia saúde”, haktuir Ermelinda da Silva iha Bidau-Toko Baru, ohin.
Iha inspesaun AIFAESA, ohin, iha Kios Hadedep Enin identifika produtu balu liu prazu, tanba ne’e na’in ba kioske refere rekoñese katak nia sasán liu prazu ne’e katak falta kontrolu.
“Loos duni sasán balu liu prazu, ne’e tanba la kontrola. Ha’u hatene katak kuandu fa’an sasán liu prazu ne’e ladi’ak ba ema nia saúde”, dehan Ermelinda ne’ebé prontu atu ba hatán iha AIFAESA hodi esplika kona-ba ninia aktu ne’e.
“Ha’u prontu ba esplika tanba ita hotu moris iha lei nia okos. Durante ne’e ema la mai sosa sasán ne’ebé liu ona prazu, no sira mai mós antes sosa sira sempre haree uluk. Ami atu fó ba ema sira sosa sei haree uluk, hanesan dosi sira ne’ebé ema lori mai tau iha ami-nia kioske, kuandu aban ninia data mate ami informa ona ba sira atu troka”, katak Ermelinda.
AIFAESA nia inspesaun ne’ebé realiza ohin ne’e apreende (foti) sasán liu prazu no sigarru ilísitu sira.
Produtu ne’ebé AIFAESA foti mak hanesan masako, marmelada, dosi ho marka Gerry, no sigarru LA ho marka stiker.
Notísia relevante : Inspesaun Konsentrada Apreende Sigarru Ilísitu no Sasán Liu Prazu
Jornalista : Antónia Gusmão
Editora : Maria Auxiliadora
