DILI, 27 novembru 2019 (TATOLI) – Koordenadór Autoridade Inspesaun no Fiskalizasaun Atividade Ekonómika no Sanitária (AIFAESA), Abílio Oliveira Sereno, informa iha 3 dezembru 2019, AIFAESA sei asina akordu kooperasaun ho Badan Pengawas Obat dan Makanan (BPOM) Repúblika Indonézia atu ajuda hodi kontrola ai-han ne’ebé sirkula iha Timor-Leste.
“Ami sei bá asina MoU (memorandum of understanding) ida ho Institutu BPOM Jakarta, iha 3 dezembru atu sira ajuda ita hodi haree kualidade produtu Indonézia nian ne’ebé fa’an iha ne’e”, Abílio Sereno ba jornalista sira liuhosi konferénsia imprensa iha edifísiu AIFAESA, Matadouru, ohin.
Aléinde ne’e mós, AIFAESA sei aproveita hodi lori amostra foos globus ne’ebé deskonfia laiha kualidade ka foos plástiku atubele halo teste iha laboratóriu BPOM.
“Ita seidauk asina akordu, maibé ami haruka ona karta ida ba BPOM atu sira bele simu amostra foos globus hodi halo teste, maibé depende sira hatán ita-nia pedidu, se sira hatán, di’ak liután”, salienta.
Enkuantu, AIFAESA nia responsabilidade maka halo inspesaun no kontrola ba kualidade ai-han, maske seidauk iha laboratóriu.
“Ami laiha laboratóriu atu kontrola kualidade, baibain inspetór sira tun bá terrenu hodi halo inspesaun no duvida ai-han nia kualidade, ami foti produtu hodi haruka ba Ministériu Saúde nian, dalaruma sira halo teste maibé depende ba ekipamentu, maibé AIFAESA esforsu nafatin liuhosi laboratóriu iha Indonézia”, katak.
Entretantu, AIFAESA nia intervensaun akontese bainhira produtu sira tama iha merkadu, maibé la’ós responsabilidade AIFAESA nian de’it, más responsabilidade Ministériu Agrikultura, Kuarentena, Ministériu Finansa liuhosi Aduaneira.
Notísia relevante : AIFAESA Sei Koopera ho BPOM Indonézia Hodi Halo Kontrolu ba Ai-Han
Jornalista : Zezito Silva
Editora : Maria Auxiliadora
