DILI, 02 dezembru 2019 (TATOLI)- Komandu Polisia Munisípiu Dili hala’o hela identifikasaun ba autór balun ne’ebé parte polisia deskonfia envolve forte iha kazu taa kanek vítima Alexandre de Jesus Costa (16) iha área sentru kombustivel (PERTAMINA), Bebora, Dili.
Notísia Relevante : Estudante ESG Nobel da Paz Ida Hetan Agresaun Fízika Husi Ema Deskoñesidu
Alexandre nu’udar Estudante Segundu Anu iha Eskola Pre-Sekundária Faról, Dili, hela iha Aldeia THT Bairru-Pité hetan taa hosi suspeitu deskoñesidu ho katana iha oin rezulta vítima nia inus kotu no daudaun ne’e hala’o hela tratamentu intensivu iha Ospitál Nasionál Guido Valadares (HNGV-sigla portugés).
Segundu Komandante Polisia Munisípiu Dili, Superintendente Asistente Polisia, Euclides Belo dehan, vítima hetan taa hosi ema deskoñesidu bainhira ho motór liu ba área Bebora sosa sigarru no tua.
“Daudaun ne’e PNTL suspeita ona pesoál balun ne’ebé konsidera bele sai suspeitu ou bele suspeitu seluk ne’ebé ami sei halo hela prosesu identifikasaun para bele deskobre se-se maka envolve sei ka’er hotu,” dehan Euclides ba jornalista, ohin, iha Komandu Polisia Munisípiu Dili, Caicoli.
Ho kazu suna malu, hana malu no asalta malu ne’ebé kontinua akontese iha Dili laran halo públiku kapitál Dili kontesta promesa polisia atu asegura seguransa movimentu livre iha oras 24, nune’e Komandante Euclides responde katak, natureza kazu sira ne’ebé akontese mai hosi motivu joven sira ódiu malu hosi problema privadu nian.
“Klaru katak problema sira ne’e akontese tanba joven sira ódiu malu. Se, ema ataka malu ita haree ita sempre halo prevensaun, maibé ami respeitu públiku sira nia kritika mai ami hodi halo nafatin seguransa,” Euclides hateten.
Antes ne’e iha loron 15 Novembru liubá, ema deskoñesidu na’in rua uzu motór Mio Beat sona kanek labarik ida ho naran Simão Fernandes Mendonça Hornay iha área Estrada Sentru Kombustivel Raikotu nia oin.
Kazu ne’e rasik akontese too agora Eskuadra Polisia Comoro Dili no Ofisial Polisia Suku no Konsellu Polisiamentu Komunitáriu (KPK) rekolla ona informasaun maibé seidauk kaptura suspeitu sira.
Kronolojia kazu ne’e akontese, bainhira vítima hamriik hela iha estrada ibun, derrepente ema deskoñesidu rua ho motór lansa sona ba vítima nia kotuk laran.
Kazu hanesan, iha tersa kalan (19/11), kuaze s tuku 20:10, ema deskoñesidu ho motór taka oin lori arma kro’at sona kanek mós vítima Flávio da Costa (18) área estrada Eskola Sekundária 4 Setembru Balidi Dili nia oin. Asaun krime ne’e rezulta vítima nia kotuk naklees no kanek makas.
Suspeitu na’in rua ne’e Polisia Munisípiu Dili ka’er ona iha sira nia rezidénsia parte Likintai, Taibesi, Dili, hamutuk ho motór Honda Beat mutin rua la iha xapa matríkula no Motór Mio-Z ida ho xapa matríkula K1860.
Nina Dias Mout iha Tasi Ibun
Iha parte seluk, Euclides Belo dehan, Polisia mós halo ona identifikasaun ba kazu Matebian, Nina Dias Ximenes ne’ebé sofre moras mentál mate iha tasi tasi ibun Palásiu Governu Dili iha domingu (01/12) lokraik tanba mout no hemu tasi been barak.
Parte Polisia Forensik Nasionál mós lori ona matebian ba Ospitál Nasionál Guido Valadares hodi halo autópsia no família sira lori ona ba uma hodi hala’o preparasaun ba serimónia funerál.
Durante sei moris, matebian partisipa mós iha Asosiasaun Kombatente Brigade Negra (ACBN-sigla portugés) hodi kontribui ba luta Timor-Leste nia independénsia.
Iha era Timor-Leste independénsia, matebian ba servisu iha Inglaterra, maibé tanba sofre moras ikus mai matebian fila fali mai Timor-Leste hodi hala’o tratamentu saúde, maibé moras mentál kontinua ataka matebian too hakotu iis.
Jornalista : Eugénio Pereira
Editór : Francisco Simões
