Venezuela Sei Fó Bolsu Estudu iha Area Protesaun Sosiál
DILI, 09 dezembru 2019 (TATOLI)-Ministériu Solidariedade Sosiál no Inkluzaun (MSSI) sei asina nota entendimentu (MoU-sigla inglés) ho Governu Repúblika Venezuela hodi fó oportunidade bolu estudu ba funsionáriu MSSI ho timor-oan ein-jerál atu ba hala’o estudu iha area protesaun sosiál ba nivel lisensiatura.
Vontade Venezuela nian hato’o diretamente hosi Vise Ministru Negósiu Estranjeiru no Relasaun Esteriór Repúblika Bolivariana Venezuela, Ruben Dario Molina ba Ministra MSSI, Armanda Berta dos Santos, liuhosi enkontru bilateral, ohin, iha Edifísiu MSSI, Caicoli, Dili.
Liuhosi enkontru ne’e, parte rua mós ko’alia kona-ba sistema protesaun sosiál ne’ebé daudaun ne’e implementa iha Venezuela ne’ebé dezenvolvidu tebes atu oinsá bele tulun hodi dezenvolve ka mellora liu tan sistema MSSI nian.
“Espera katak, ita bele asina akordu ne’e, nune’e bele haruka funsionáriu no timor-oan sira ba hasai estudu protesaun sosiál iha Venezuela,” Ministra Berta hateten.
Ministra Armanda Berta dos Santos, onradu tebes ho vizita Vise Ministru Negósiu Estranjeiru Ruben Dario Molina, nu’udar inisia di’ak ba hametin lasu amizade entre governu rai rua.
Jornalista : Nelson de Sousa
Editór : Francisco Simões
