DILI, 16 dezembru 2019 (TATOLI)-Ohin dadeer, purvolta tuku 5:30 Otl, komunidade sira iha area Balidi, Dili, hakfodak no tuku tuur, haree asidente tráfegu entre karreta prado dragon, xapa matrikula A-10126 ho karreta fuso ho xapa matrikula 50128.
Asidente ne’e rezulta Vasco da Costa dos Santos (17) mate fatin no Remígio Guterres Nunes, nu’udar motorista karreta prado dragon kanek todan hodi hetan tratamentu intensivu iha Ospitál Nasional Guido Valadares Dili (HNGV).
Asidente tráfegu ne’e akontese bainhira matebian Vasco ho Remígio ho karreta Prado Dragon kór orange mai hosi área Igreja Balidi ho velosidade másima soke karreta fuso orange ne’ebé para hela iha estrada ibun parte karuk nian.
Komandante Polisia Munisípiu Dili, Superintendente Xefe Armando Monteiro, esplika, bazeia ba investigasaun ekipa tránzitu iha terrenu nota, karreta Prado Dragon halai makas bainhira atu ultrapasa karreta balun maka hakfodak soke karreta fuso boot ne’ebé kondús hosi Anacleto Ribeiro.
“Motorista Remígio Guterres Nunes halai karreta ho velosidade másimu liu. Sira atu ultrapasa karreta seluk la konsege kontrola aan, ikus mai sira soke karreta fuso hodi rezulta vítima Remígio Guterres Nunes kanek grave baixa hela iha HNGV no Vasco dos Santos mate. Entretantu Anacleto Ribeiro nu’udar motorista karreta fuso iha hela polisia hodi submete ba investigasaun,” informa Armando Monteiro ba jornalista iha Komandu PNTL Munisípiu, Dili.
Hosi rezultadu investigasaun parte tránzitu identifika iha indikasaun matebian Vasco ho Remígio deskonfia konsumu tua makas.
“Iha indikasaun sira hemu tua, maibé ita nia ekipa sei halo teste alkóliku maka foin bele hatene sira nia konsumu alkol ka lae,” Armando Monteiro hateten.
Matebian Vasco da Costa dos Santos ho nia kolega Remígio hela iha Suku Vila-Verde ho karreta sai hosi uma ba vizita kolega no família sira atu fila fali ba uma Vila-Verde maka hasoru asidente.
Jornalista : Eugénio Pereira
Editór : Francisco Simões
