DILI, 16 dezembru 2019 (TATOLI)- Durante janeiru to’o primeiru semana dezembru 2019, Komandu Polisia Nasional Timor-Leste (PNTL) Munisípiu Dili, rejista kazu krime 1.509 mak akontese iha area jurizdisaun Dili.
Notísia Relevante : Asidente Balidi, Vasco Mate Fatin no Remígio Kanek Todan
Hosi total kazu sira ne’e, PNTL konsege prosesa ona ba Ministériu Públiku hamutuk 1.108, arkivu iha Ministériu Públiku 66, investigasaun PNTL 332 no arguido ne’ebé kumpre pena iha komarka hamutuk na’in 8.
Kazu ne’ebé domina liu hosi total kazu sira ne’e mak Ofensa Integridade Simples (OIFS) ho númeru kazu 412, Maus Tratu ba Konjuge 142, Ameasa 78, Danu Simples 86, Arma Proibida 77, Furtu Agravadu 54, Ofensa Integridade Fíziku Agravadu (OIFA) 40, Esplorasaun Jogu Ilísitu 31, no Furtu Simples 28.
Komandante Polisia Munisípiu Dili, Superintendente Xefe, Armando Monteiro, ba jornalista, ohin, iha Komandu Munisípiu Dili, informa, Komandu Polisia Munisípiu Dili rejista mós kazu asidente tráfegu no insidente ne’ebé akontese iha Dili hamutuk 783.
Hosi totál kazu ne’e, rezulta ema na’in 28 mate, 121 kanek todan no nain 787 kanek kaman. Kazu balun PNTL konsege prosesa ba Ministériu Públiku hamutuk 23 no rezolve familiár 537 no prosesu pendente hamutuk 230.
Nia informa mós katak, kazu asidente no insidente sira ne’e akontese tanba problema fatór umanu bainhira kondús karreta ho kondisaun konsumu alkol no lanu hodi rezulta asidente.
Atu evita kazu ne’e, Komandu PNTL sei kontinua halo sosializasaun másimu ba kódigu estrada no sinais tránzitu nian, inklui halo operasaun kontrola motorista sira atu kondús karreta hodi kontrola aan para evita asidente.
Hatama $98.059,000 Ba Kofre Estadu
Durante janeiru to’o dezembru 2019, Seksaun Polisia Tránzitu Dili konsege hatama reseita ba kofre Estadu hamutuk $98.059,000.
Orsamentu ne’e PNTL koleta hosi motorista sira ne’ebé viola regra tránzitu hanesan kondús karreta no motór la iha dokumentu, xapa matríkula la iha, viola sinais tránzitu ne’ebé kuaze akontese loro-loron iha kapitál Dili.
Jornalista : Eugénio Pereira
Editór : Francisco Simões
