DILI, 23 dezembru 2019 (TATOLI) – Parlamentu Nasionál (PN) liuhosi diskusaun iha plenária, aprova ona pedidu hosi Governu, hodi halo debate ho karakter urjénsia ba Proposta Lei no.9/V(2ª) Orsamentu Jerál Estadu (OJE) 2020 foun iha janeiru tinan oin.
Hafoin diskusaun, pedidu ne’ebé fó sai hosi Komisaun C ne’ebé trata Asuntu Finansa Públika liuhosi rezultadu finál relatóriu pareser, konsege hetan aprovasaun ho votu maioria a-favór 37, maibé Bankada FRETILIN deside la hiit kartaun.
Rekomendasaun hosi Komisaun C kona-ba debate urjénsia mak hanesan, prazu ezame komisaun no produsaun pareser durante loron 5, pareser komisaun durante loron 7 iha loron úteis, limite debate jeneralidade másimu loron 3, limite debate espesialidade loron 7 no redasaun finál loron 2.
Notísia Relevante: Governu Dada Proposta OJE 2020 Husi PN
Xefe Bankada FRETILIN, Aniceto Guterres, afirma pozisaun bankada ne’ebé la fó votu, ho razaun iha momentu Proposta Lei OJE retirada, Primeiru-Ministru, Taur Matan Ruak, promete sei submete filafali iha loron 12 dezembru.
“La konsege kumpre loron ne’e no to’o loron 19 dezembru mak mai fali, hodi husu fali debate ho urjénsia. Bainhira buat ne’e urjente duni, tanba sá mak loron 13 dezembru ne’e la lori mai kedas, problema iha ne’ebé? Loron 20 dezembru, Primeiru-Ministru ba férias. Sá urjénsia mak ida ne’e?”, Deputadu Bankada Opozisaun ne’e kestiona, segunda ne’e.
Nia argumenta, bainhira pedidu urjénsia mai ho proposta foun, signifika tenke iha prosesu foun no loloos la tama iha lejizlasaun komún ne’ebé mak orsamentu ne’e la retira hosi PN.
Tanba ne’e, aprezentasaun orsamentu tinan ida dala-ida no planu aprezentasaun mós definidu.
Hatan ba kestaun ne’e, Prezidente Komisaun C, Maria Fernanda Lay, hateten pedidu urjénsia merese atu Parlamentu aprova.
“Ha’u fó hanoin de’it atu Governu bele organiza komisaun atu aprova ninia kalendáriu, loron 6 janeiru ita tama mai, ita bele iha audiénsia”, dehan Deputada Bankada CNRT.
Deputadu Bankada CNRT, Adérito Hugo da Costa, esplika prosesu OJE la kategoria lejizlasaun komún maibé prosesu lejizlasaun espesiál.
“Tanba ne’e mak submete iha loron 15 outubru kada tinan, maibé tanba prosesu lejizlasaun espesiál mak iha rejime duodésimu, nune’e iha sirkuntánsia bainhira orsamentu seidauk aprova até 1 janeiru, rejime duodésimu bele kobre despeza Estadu nian to’o másimu fulan fevereiru. Tanba ne’e, nesesáriu duni atu halo debate ho urjénsia”, deklarasaun votu hosi Deputadu Adérito Hugo da Costa.
Iha fatin hanesan, Deputadu Bankada KHUNTO, Luis Roberto, lamenta ho bankada FRETILIN ne’ebé tuur iha sala laran maibé lakohi vota.
“Rejimentu hakerek momoos dehan atu vota kontra ka a-favór tenke vota, maibé balun tuur iha laran la vota, ne’e tanba saida? Ha’u vota a-favór ba pedidu ne’e tanba orsamentu ne’e urjente duni atu responde ba nesesidade nasaun no povu nian”, dehan Deputadu Bankada Governu ne’e.
Deputadu Bankada PLP, Abel Pires, konsidera Proposta Lei OJE 2020 tenke debate ho urjénsia.
“Ha’u vota a-favor tanba prosesu orsamentu ne’e espesiál no importante ba povu nia moris di’ak, labele dada naruk no nesesariamente”, nia subliña.
Jornalista: Evaristo Soares Martins
Editór: Xisto Freitas
