DILI, 13 janeiru 2020 (TATOLI)-Ministru Defeza no Ministru Interiór Interinu, Filomeno Paixão de Jesus, ameasa sei hasai oknum Polisia Nasionál Timor-Leste hahú hosi komandante unidade to’o ajente sira hosi instituisaun polisia bainhira laiha dixiplina no falta respeita ba kargu ierarkia.
Ministru afirma, durante ne’e nota mosu failansu balun hahalok indixiplina no falta respeita ba malu tanba akontese bebeik komandante sira balun la seriu hodi halimar telefone bainhira Komisáriu PNTL hato’o hela deskursu iha sorumutu instituisaun nian.
“Sentidu ierarkia ne’e la iha negosia, iha ne’e sé mak boot nia boot la iha negosiasaun. La’ós komandante ko’alia ita tuur ba buti fali telefone. Ne’e komandante ba oin tenke iha asaun hosi komandu, sé mak halo hanesan ne’e duni sai husi reniaun. Ita la halo hanesan ne’e labele, duni sai e foti prosesu,”dehan, Filomeno Paixão de Jesus, bainhira lansa fatuk dahuluk ba konstrusaun edifísiu foun PNTL iha Caicoli, foinlalais.
Tanba ne’e, Filomeno Paixão apela ba komandante hotu-hotu hahú hosi Komandante Munisípiu 12, RAEOA no unidade sira atu dixiplina no respeita ba kargu ierarkia sira hodi dezenvolve instituisaun seguransa ne’e.
“Sé maka foti ierarkia komandante ne’e, Governu, Prezidente no Parlamentu, sé ita la kumpre nian, nia ko’alia ita buti telefone, entaun ita halimar de’it,” Ministru Filomeno, lamenta tan.
Iha parte seluk, Ministru Defeza no Ministru Interiór Interinu ba Governu daualu ne’e mós nota, durante ne’e laiha kooperasaun di’ak entre komandante balun ho servisu intelejénsia Polisia bainhira halo operasaun ba kazu ruma.
“Kuandu tuun ba terenu atu halo operasaun ida ita simu fali informasaun husi liur, envezde komunika ho komandante sira, ba komunika fali ho ema seluk ne’e sala, sei estraga ita-nia servisu no ita-nia misaun,” tenik Governante.
Iha fatin hanesan eis Primeiru Komandante Jerál PNTL, Paulo de Fátima Martins, rekoñese kestaun indixiplina no falta respeita ba ierarkia mosu duni iha instituisaun Polisia.
“Ita persiza lideransa ida di’ak , servisu hamutuk ho nia ofisiál sira komandante munisípiu, komandante operasaun no komandante unidade sira para bele haboot Instituisaun PNTL. Sira tenki hadi’a, tanba ita nia PM, Taur Matan Ruak dehan hadi’a lai PNTL nia uma laran ne’e loos duni. Nune’e mós Ministru ohin dehan ne’e loos tenke respeita ierakia komandu,”dehan Nia.
Eis Deputadu Parlamentu Nasionál ne’e mós husu ba komandante sira atu dixiplina no servisu hamutuk hodi dezenvolve Institusaun PNTL ba futuru.
Jornalista: Eugénio Pereira
Editór :Francisco Simões
