DILI, 20 janeiru 2020 (TATOLI) – Tribunal Distritál Dili (TDD), ohin adia hikas julgamentu ba prosesu kazu pekulatu, borla agravadu, administrasaun danoza, no falsifikasaun dokumentu iha Ministériu Turizmu Komérsiu no Indústria (MTCI-sigla portugés) tanba arguido prinsipál inisiál ADC atuál membru Parlamentu Nasionál auzénsia ho razaun sei okupadu ho diskusaun Orsamentu Jerál Estadu (OJE).
Ho auzénsia Deputadu ADC nian ne’e, maka Tribunal Distritál Dili tenke halo hikas karta ofísiu ida ba Prezidente Parlamentu Nasional (PPN), Arão Noe de Jesus, hodi deside loron no fulan ne’ebé flexible atu autoriza Deputadu ADC partisipa iha julgamentu tuir mai.
Tuir faktu ne’ebé arrola husi Ministériu Públiku hatudu katak, arguido ADC hamutuk ho arguido rua seluk; JIB ho GPC ne’ebé okupa kargu xefia iha MTCI deskonfia sai nu’udar autór material ba krime pekulatu ne’ebé previstu iha artigu 295.
Kazu ne’e, Ministériu Públiku mós notifika PMS hanesan arguido nu’udar mós na’in ba kompañia Star Unipessoal, Lda, ba krime partisipasaun ekonómika iha negósiu no administrasaun danoza ne’ebé previstu iha artigu 299 no 274 husi Kódigu Penal.
Arguido seluk ho inisiál PMV ne’e MP akuza nu’udar ko autór material ba krime borla agravadu, administrasaun danoza, no falsifikasaun dokumentu.
Arguido sira ne’e, tuir akuzasaun MP nian, katak, iha tinan 2014 MCIA iha osan atu sosa ekipamentu diversu husi orsamentu kapitál menór ho montante global $200,000.00, ne’ebé ate juñu 2014, orsamentu refere seidauk ezekuta.
Ekipamentu sira ne’ebé merese atu kompras maka hanesan, test kids ba laboratóriu, ekipamentu test ba ethanol, mákina pakotamentu ba kafé, mákina sona kafé, nu’udar fasilidade iha sentru treinamentu iha Matadoru, atu fó treinamentu ba ema sira.
Husi arguido sira nia hahalok ne’e fó prezuiju ba estadu Timor-Leste ho montante $143,500.00.
Audiénsia julgamentu nee, prezide husi Juis koletiva Antonio do Carmo, Albertina Neves, Sribuana da Costa, Ministériu Públiku reprezenta husi Prokuradór Rogerio Viegas, arguido sira hetan asisténsia legal husi Advogadu Privadu no Defensor Públiku.
Jornalista : Domingos Piedade Freitas
Editór : Francisco Simões
