Viatura Estadu Sirkula Fali Ona iha Sábadu ho Domingu
DILI, 23 janeiru 2020 (TATOLI) – Viatura Estadu nian komesa halo fali ona operasaun iha loron feriadu no sábadu ho domingu.
Notísia Relevante : Operasaun Konjunta “Prende” Viatura Estadu 60
Utilizadór viatura Estadu nian livremente la’o fali ona iha fora oras servisu tanba ekipa konjunta, kompostu husi Komisaun Anti Korrupsaun (KAK), Polisia Nasional Timor-Leste (PNTL), Diresaun Nasional Patrimóniu Estadu (DNTE) ho Diresaun Nasional Transporte no Terrestre (DNTT) suspende tiha ona operasaun besik fulan tolu ka haat ona.
Tuir observasaun Provedoria dos Direitus Umanus no Justisa (PDHJ) nian, ikus-ikus ne’e, nota, viatura Estadu nian balun livremente halo fali sirkulasaun iha kapitál Dili ba Munisípiu iha tempu feriadu no sábadu ho domingu.
Diretór Fiskalizasaun no Monitorizasaun PDHJ, Bartolomeu Gonçalves, afirma, tuir loloos instituisaun ida-idak iha ninia lojístika atu regula viatura Estadu no inspesaun konjunta sei halo inspesaun iha kada ministeriais rutina atu bele haree utilizasaun viatura Estadu tenke tuir nia regra loloos ba interese Estadu nian.
Iha lei númeru 08/2003 ne’ebé regula kona patrimóniu Estadu liuliu ba objetivu servisu nian, la’ós ba asuntu privadu.
“Ami halo ona enkontru entre PDHJ ho KAK atu hahú planeia ba inspesaun viatura Estadu atu minimiza gastu no infrasaun sira ne’ebé komete husi funsionáriu estadu no membru Governu sira,” hateten Bartolomeu Gonçalves, ohin, ba Ajénsia TATOLI iha nia kna’ar fatin PDHJ, Caicoli, Dili.
Tuir nia haree, operasaun konjunta ba viatura Estadu nian durante ne’e pozitivu tebes no iha nia kontribuisaun ida di’ak hodi konsege minimiza movimentu viatura Estadu nian iha loron feriadu, sábadu ho domingu.
Jornalista : Domingos Piedade Freitas
Editór : Francisco Simões
