DILI, 27 janeiru 2020 (TATOLI) – Ministru Ensinu Superiór, Siénsia no Kultura (MESSK), Longuinhos dos Santos informa katak governu liuhusi enkontru liña ministeriál sira diskute ona mekanizmu hodi halo evakuasaun ba estudante bolseiru timoroan sira iha Wuhan, Xina. Nune’e, sei prepara kustu orsamentu evakuasaun atu aprezenta iha Konsellu-Ministru (KM) hodi hetan desizaun.
“Solusaun dahuluk ida lalais liu mak halo evakuasaun ba alin estudante bolseiru sira husi Wuhan atu mai iha provinsia sira seluk iha Xina ne’ebé la hetan afetadu ba moras Corona hanesan Xanghai,” Ministru Longuinhos dos Santos ba jornalista sira iha Palásiu Governu, ohin.
Notísia relevante:Inan-Aman Estudante Bolseiru Preokupa Ho Kondisaun Oan Sira Iha Wuhan
Tuir nia, atu halo evakuasaun mós presiza kustu orsamentu uituan tan ne’e diskusaun entre MRLAP, MESSK, MNEK, MS, no Defeza deside ona, semana oin sei aprezenta rezolusaun ba Konsellu-Ministru, depois kuandu hetan ona aseitasaun mak foin hahú halo asaun evakuasaun ba estudante bolseiru sira ne’e.
“Ita ohin halo enkontru ida ne’e oinsá atu buka ninia mekanizmu ba ita-nia alin sira ne’ebé mak enfrenta hela situasaun difisil kona-ba virus coronaiha provínsia Wuhan, Xina”.
Entretantu, kustu ba evakuasaun estudante sira ne’e, tuir ministru katak seidauk deside ninia montante maibé liuhusi rezolusaun ne’ebé sei aprejenta ba Konsellu-Ministru ne’e mak foin aneksu ninia kustu detalladu atu nune’e bele hetan desizaun.
Notísia relevante:PN Sei Debate Virus Corona no Inundasaun ho Karáter Urjénsia
Jornalista : Tomé Amado
Editór : Rafy Belo
