DILI, 03 fevereiru 2020 (TATOLI) – Primeiru-Ministru (PM), Taur Matan Ruak, bolu Sekretáriu Estadu ba Asuntu Kombatente Libertasaun Nasionál, Gil da Costa Monteiro ‘Oan Soru’ hodi husu klarifikasaun kona-ba pensaun ba veteranu ne’ebé hahú janeiru 2020 ko’a $30 kada fulan husi veteranu iha territóriu tomak.
“Primeiru-Ministru bolu ha’u mai, atu hatene situasaun kona-ba legalidade iha ka lae foin daudaun ita ko’a osan veteranu ninian atu rai fundu ba sira rasik no sira nia jerasaun, ne’e ita prepara polítika ba kombatente sira no oan sira nia futuru”, tenik Oan Soru iha Palasiu Governu, segunda ne’e.
Nia rekoñese, preokupasaun ne’e la’ós mai de’it husi Xefe Governu, maibé mós husi Prezidente Republika, Francisco Guterres Lú Olo no sosiedade tomak, maibé antes ko’a iha ona konsultasaun kle’an to’o aprova deliberasaun númeru 1 iha kongresu dahuluk Konsellu Nasionál Kombatente no Libertasaun Nasionál iha loron 21 dezembru 2019, hodi fó kbiit ba Sekretaria Estadu Antigu Kombatente Libertasaun Nasionál hodi hahú implementa polítika kriasaun fundu investimentu ba veteranu.
“Konsulta ne’e desde 2018 kuandu ha’u ata simu pose hanesan Sekretáriu Estadu, ita halo sosializasaun no konsulta iha munisípiu sira, konsulta ho estrutura sira iha munisípiu hotu to’o 2019 kontinua konsulta no ita ramata konsulta ho estrutura rejionál sira. Ikus mosu proposta deliberasaun ida ne’ebé mosu iha kongresu dahuluk”, nia haktuir.
Tuir governante ne’e, hirak ne’e hotu kuandu liuhosi deliberasaun ida ona signifika fó konfiansa tomak hodi bele hakat prosesu ne’e.
“Entaun ita tenke hakat pasu ida atu ita haree ita hakarak tan ba oin ka hakiduk ba kotuk, tanba ne’e agora la’o ona no agora presiza hadi’a hodi la’o ba oin nafatin. Ita prepara fundu hafoin ita ko’alia kona-ba jere fundu. Ezemplu konkretu karik dehan ita kuandu atu kuda batar tenke iha batar nia fini”, Oan Soru salienta.
Nia subliña, tenke hahú husi buat ne’ebé ema hotu laiha esperansa maibé bele muda nia sai realidade.
“Estatutu kombatente klaru hela, ha’u ohin simu pensaun maibé bainhira ha’u mate no ha’u nia kaben mate tuir ha’u, oinsá ho oan sira nia futuru. Ida-idak kestiona kona-ba legalidade maibé la hare ba situasaun própriu atuál. Tanba ne’e ita tenke prepara legal ida hodi proteje”, nia dehan tan.
Jornalista: Julia Chatarina
Editór: Xisto Freitas
