DILI, 04 fevereiru 2020 (TATOLI)-Komunidade lubun nu’udar na’in ba baraka 70-resin iha Kampu Alor, Dili, sente la kontente ho Prezidente Autoridade Munisípiu Dili, Gaspar Soares, tanba la akomoda komunidade sira nia sujestaun molok sobu baraka hirak ne’e.
Notísia Relevante : Evita Ema Hela Fali, Munisípiu Dili Sei Sobu ‘Baraka’ iha Kampu Alor
Komunidade sira deklarante simu desizaun Governu nian no kolabora ho Governu atu sobu baraka sira ne’ebé antes ne’e sira fó aluga ba negosiante Indonéziu sira uza hodi fa’an roupa ho nesesidade báziku sira seluk. Maibé, sira husu ba Autoridade Munisípiu Dili atu sobu tetuk hotu kedas. La bele iha baraka ida mak hela, inklui farmásia (apotik) ne’ebé harii besik Sede Suku Kampu Alor.
Komunidade sira sai lakontente liu tan bainhira sira sei ko’alia hela ho Prezidente Autoridade sobre sobu farmásia ne’e, maibé Prezidente Autoridade dezvia tiha de’it hodi la’o sees husi sira no sa’e kedas karreta.
Tuir observasaun Ajénsia TATOLI nota iha terrenu nota katak, problema dezentendimentu entre komunidade ho Prezidente Autoridade Dili, Gaspar Soares, mosu tanba komunidade la aseita desizaun sobu de’it barraka balun no balun la sobu, liuliu farmásia ne’ebé harii liña hela ho baraka sira seluk.
Komunidade sira haklalak no ameasa bainhira Governu la sobu farmásia ne’e maka sira sei halo asaun hodi sunu moos uma ne’e.
“Se hakarak sobu barraka tenke sobu mós farmásia no sede suku ne’e hotu, tanba ne’e rai estadu nian hotu. Se lae, ami sei sunu mós hotu,” afirma komunidade ida hodi foti lia hasoru Prezidente Autoridade Munisípiu Dili.
Populasaun sira konsidera estadu ida ne’e ukun ho hahalok ditadura, tanba nasaun sofre hela impase polítika ne’ebé afeta ba ekonomia no povu moris, maibé ukun na’in sira la rezolve hodi halo povu kontinua sai vítima.
Hataan ba lamentasaun ne’e, Prezidente Autoridade Munisípiu Dili, Gaspar Soares, hateten, preokupasaun komunidade sira nian ne’e la lójika.
“Imi nia hanoin ne’e la lójika. Sede suku Estadu nian labele sobu,” dehan Gaspar hodi la’o sees husi komunidade nia leet hodi kontinua sa’e nia karreta.
Haree ba atitude Prezidente Autoridade nian ne’ebé la’o sees husi komunidade sira ne’ halo katuas ida foti lia hakilar “Keta halai………. Mai… mai ita ko’alia……..ita foin atu ko’alia imi halai uluk ona, povu ne’e iha maka Estadu ne’e iha.”
Hataan ba lamentasaun povu nian, Xefe Suku Kampu Alor, Postu Administrativu Don Aleixo, Munisípiu Dili, Alcina Carvalho Santos, preokupasaun komunidade nian ne’e pretendente no presiza duni iha klarifikasaun.
“Ha’u nia komunidade la satisfás no ha’u rasik triste tebes, tanba Estadu sobu la fó buat ruma ba sira. Ha’u husu ba governu nusa la rezolve uluk krize ne’e, tanbasá imi mai sobu halo mosu tan problema ba povu, se hakarak ukun povu tenke ukun ho dignu,” Xefe Suku Alcina hateten.
Xefe Suku Alcina promote sei lori preokupasaun povu nian hodi hato’o ba Prezidente Repúblika, Francisco Guterres “Lú Olo” liuhusi sorumutuk ne’ebé Prezidente Repúblika atu halo ho Xefe Suku sira .
Mezmu mosu dezentendimentu, maibé parte Polisia Nasionál Timor-Leste (PNTL) ne’ebé koloka iha terrenu konsege akalma situasaun no fó tempu ba komunidade sira rasik maka sobu barraka no parte ekipa Munisipiu Dili lori mós karreta loader hodi sobu barraka balun iha área Mesquita An’nur nia oin.
Jornalista : Eugénio Pereira
Editór : Francisco Simões
