DILI, 05 fevereiru 2020 (TATOLI) – Komandu Polísia Munisípiu Dili liuhusi Seksaun Tránzitu Dili, tersa kalan (4/2/2020), ezekuta operasaun alerta dois iha área Otél Timor, konsege halo apreensaun ba motorizada 17 tanba la iha dokumentu.
Notísia Relevante : Asidente Tráfegu iha Akanunu, Na’in Rua Mate Fatin no Rua Kanek Todan
Motorizada sira ne’e polísia apreende, tanba motorista sira la iha dokumentu hanesan karta kondusaun no dokumentu sira seluk.
“Ami ezekuta operasaun alerta dois hodi halo auto stop ba transporte públiku, konsege apreende motór 17 ne’ebé komete infrasaun, liuliu la iha dokumentu, inklui motor na’in sira la iha karta kondusaun”, hateten Segundu Komandante Polísia Munisípiu Dili, Superintendente Xefe Euclides Belo, ohin, ba jornalista iha Polísia Munisípiu Dili, Kaikoli.
Operasaun polísia ne’e halo hodi kontrola sidadaun Timoroan, hodi evita asidente no insidente tráfegu.
Nia dehan, operasaun ne’e polísia halo apreensaun ba motór no motorista balun ne’ebé tenta halai sees husi polísia la uza kapasete ikus mai hasoru fali asidente tráfegu (soke).
Motór hirak ne’e agora polísia asegura iha Polísia Munisípiu Kaikoli, hodi hein motorista sira kompleta dokumentu no selu taxa foin bele lori resibu ba foti motór.
Ba oin, Seksaun Tránzitu Dili kontinua halo auto stop iha kapitál hodi kontrola movimentu transporte públiku iha dixiplina bainhira utiliza estrada públiku no kontrola mós ema labele lori sasán kro’at.
Jornalista : Eugénio Pereira
Editór : Francisco Simões
