DILI, 18 fevereiru 2020 (TATOLI)-Lezada AM, ohin, sofre hela kanek fitar iha nia isin lolon tanba de’it lia tun ba nia primu CT hanesan arguidu bainhira haree nia primu nia fahi tama toos laran hodi sukit hotu ai-han sira ne’ebé AM kuda iha kintál laran.
Aktu krime ne’ebé arguidu CT halo ba nia primu AM tenke sofre kanek todan tanba nia primu CT lori katana taa AM nia kotuk laran no halo nia órgaun balun iha kabun laran kotu ba haat.
Kazu omisídiu simples ho forma tentadu ne’e, ohin, julga iha Tribunál Distritál Dili (TDD) ne’ebé aprezenta arguidu CT ho lezadu AM mai husi iha Suku Legimia, Postu Administrativu Ermera Vila, Munisípiu Ermera.
Tuir akuzasaun husi Ministériu Públiku (MP) katak, iha loron 23 novembru 2017, purvolta tuku 8:50 otl, mosu problema kona-ba fahi tama toos laran hodi estraga ai-han (batar). Tanba ne’e, lezadu AM bolu fahi nia na’in CT hodi haree ai-han ne’ebé hetan estragu.
Momentu ne’ebá, lezadu AM mós hamoos hela duut iha nia uma hún, maibé derrepente de’it arguidu CT ka’er katana ida subar iha nia kotuk, la’o nonook mai hakbesik lezadu AM hodi taa kedas lezadu to’o borus halo lezadu órgaun balun iha kabun laran kotu ba haat.
Iha Momentu ne’e kedas ema evakua lezadu AM mai Klínika Gleno, hodi hetan tratamentu intensivu, maibé tanba kondisaun grave tebes tenke lori mai iha Hospital Nacional Guido Valadares (HNGV).
To’o iha HNGV, lezadu AM hetan operasaun hodi bele suku tutan fali órgaun kabun laran balun ne’ebé arguidu CT taa kotu.
Tuir médiku sira ne’ebé halo operasaun, esplika katak, lezadu AM nia té-oan rua mak labele suku fali. Ho nune’e to’o ohin loron kondisaun saúde lezadu nian seidauk di’ak normál.
Ho aktu ne’e arguidu TC nian ne’e, MP akuza arguidu hanesan autór materiál ho forma konsumada hodi prátika krime omisídiu simples ho forma tentadu, ne’ebé previstu no púnidu tuir artigu 138, artigu 23 kódigu penál Timor-Leste.
Iha audiénsia julgamentu ne’e, arguidu konfesa katak, akuzasaun hotu tuir faktu no loos hotu. Maibé, nia parte ho lezadu dame malu ona, hodi fó multa osan $1.000,00 ho karau ida, tanba entre sira na’in-rua sei iha relasaun família husi aman-maun alin rasik.
Lezadu AM rekoñese dehan, dalaruma momentu ne’ebá nia primu arguidu TC nervozu maka’as no la kontrola-an hodi hola desizaun brutál uitoan hodi taka kedas nia.
Atu reforsa liután faktu sira kona-ba kanek lezadu nian, Tribunál presiza tan prova hodi konfirma Raiu-X husi HNGV durante loron 10 hafoin MP foti alegasaun. Tanba ne’e, Tribunál adia hikas julgamentu ne’e ba iha loron 12 marsu 2020, tuku 9:00 Otl.
Audiénsia julgamentu ne’e prezide hosi juiz koletivu António Camorna, Fonseca Afonso, Patrícia Xavier no Ministériu Públiku reprezenta husi Prokuradór Osório de Jesus, arguidu hetan asisténsia legál husi Defensór Públiku, Nelson Borges.
Jornalista : Nelson de Sousa
Editór : Francisco Simões
