FRETILIN Lakohi EA Sai Kultura Polítika Iha Timor-Leste

DILI, 18 fevereiru 2020 (TATOLI)—Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri, hateten FRETILIN lakohi Eleisaun Antesipada (EA) sai kultura polítka iha Timor-Leste.
“Se iha partidu ida ke preparadu ba eleisaun aban, FRETILIN preparadu. FRETILIN lakohi Eleisaun Antesipada tanba sai kultura polítika ida iha Timor-Leste. Ne’e mak labele. Krize ita la konsege rezolve, Eleisaun Antesipada. Ne’e hanesan feen ho la’en baku-malu no soe-malu kedas. Tanba ne’e mak FRETILIN lakohi buat ne’e atu sai kultura,” dehan Mari Alkatiri ba jornalista sira, iha CCF, Comoro, ohin.
Alkatiri afirma, FRETILIN mós lakohi katak Prezidente Repúblika ninia mandatu ba tinan-lima, nia konvida kedas Eleisaun Antesipada (EA) dalarua no dalatolu. EA ne’e bele akontese iha rai seluk hanesan Europa maibé iha Europa ne’ebá administrasaun públika ne’e sai instituisaun forte ona no la afeta.
“Agora ita-nian Eleisaun Antesipada dalarua afeta mós ba administrasaun públika. Se afeta ba administrasaun, afeta povu nia vida. Ida-ne’e mak ita tenke evita,” nia dehan.
Alkatiri argumenta, FRETILIN hakarak forma Governu iha 2023 la’ós iha 2020. Tan ne’e, nia infroma, semana ida-ne’e delegasaun FRETILIN lima tun ba munisípiu 10 ne’ebé hahú aranka ba munisípiu rua no RAEOA tanba povu mak aliadu ba FRETILIN.
Notísia Relevante: Alkatiri Husu Xanana-Lú Olo Rezolve Situasaun Polítika Atuál
Jornalista : Evaristo Soares Martins
Editór : Cancio Ximenes

