DILI, 05 marsu 2020 (TATOLI)–Primeiru Ministru (PM), Taur Matan Ruak apela, ba Timoroan tomak atu psikolójikamente tenke preparadu ba Coronavirus ne’ebé oras ne’e tama ona iha nasaun barak iha mundu.
“Psikolójikamente ita tenke preparadu. Katak, moras [coronavirus] ida ne’e hanesan mós moras sira seluk. Alende ne’e, ita haree ninia risku husi dadus ne’ebé iha, katak atualmente iha ema rihun 90 resin iha mundu tomak mak afetadu no númeru ne’ebé mate hamutuk ema na’in rihun 3 resin. Ne’e signifika, ninia númeru mate la duun boot,” dehan PM, Taur Matan Ruak, ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru-Pité, Dili.
Taur informa, durante enkontru ho PR Lú Olo ne’e sira ko’alia kona-ba asuntu importante kona-ba moars coronavirus ne’e no ko’alia kona-ba koordenasaun interministeriál ne’ebé lidera husi ministra saúde en-ezersísiu.
Tanba ne’e, Taur hateten, sira halo hela esforsu atu haree fatin ida ne’ebé mak di’ak liu atu bele prepara aan ne’ebé liga mós ho fatin izolamentu.
“Sertamente, saida mak ha’u tenke hateten ba ita-nia populasaun sira no ita hotu tenke iha nosaun katak virus ne’e la’o iha país barak iha mundu. Ne’ebé, uluk ita la hanoin katak atu to’o iha ne’eba. Antes ne’e, ita hanoin iha Xina de’it maibé realidade hatudu katak tama tiha ona iha Amérika, Austrália, Singapura, Itália, no nasaun seluk tan,” Taur subliña.
Notísia Relevante: Primeiru-Ministru Taur Matan Ruak Kongratula Koligasaun Foun
Jornalista : Cipriano Colo
Editór : Cancio Ximenes
