DILI, 27 maiu 2020 (TATOLI) – Falta oras balun atu termina ona Estadu Emerjénsia (EE) faze daruak, Primeiru-Ministru (PM), Taur Matan Ruak, akompaña husi Membru Governu sira no ekipa husi Sentru Integradu Jestaun Krize (CIGC, sigla portugés) halo diskusaun kona-ba pedidu Prezidente Repúblika ba renovasaun deklarasaun EE.
EE ba faze daruak ne’e sei ramata iha loron 27 maiu, oras 23:59, tanba ne’e hafoin rona opiniaun husi Konsellu Superiór Defeza no Seguransa no Konsellu Estadu, Xefe Estadu haruka mensajen ba Parlamentu Nasionál (PN) hodi husu autorizasaun halo estensaun ba EE faze datoluk, ba loron-30 tan.
Iha diskusaun iha Sala Plenáriu, PM Taur iha esperansa deputadu sira husi Bankada Partidu Congresso Nacional Reconstrução Timorense (CNRT) bele akompaña nafatin diskusaun ba estensaun EE maski auzénsia durante debate iha PN.
“Ha’u lamenta falta prezensa partidu CNRT nian, maibé ha’u espera katak iha fatin ne’ebé de’it maka sira iha bele akompaña diskusaun ida-ne’e, direta ka indiretamente nune’e sira mós bele fó sira nia kontribuisaun tuir mandatu ne’ebé Konstituisaun fó no mós tuir konfiansa ne’ebé povu fó ba partidu hotu, inklui CNRT”, deklara PM Taur bainhira halo intervensaun iha diskusaun ba estensaun EE, kuarta ne’e.
Notísia Relevante: Xefe Estadu Husu Autorizasaun PN Ba Estensaun Estadu Emerjénsia
KM Solisita Tan Prezidente Repúblika Estende Estadu Emerjénsia ba Loron-30
Antes hahú intervensaun, Xefe Governu felisita Prezidente Parlamentu Nasionál (PPN) foun, Aniceto Guterres no deputadu sira.
“Hakarak lori Governu daualuk nia naran no ha’u nia naran rasik hakarak parabeniza Prezidente Parlamentu Nasionál, ba ita-nia pozisaun hanesan Segunda Homen iha ita-nia Estadu”, subliña PM.
Biban ida-ne’e, Xefe Governu nota katak mudansa ne’ebé iha intensivu tebes ba kompozisaun meza iha Parlamentu inklui deputadu sira hotu, liuliu ba esforsu ne’ebé halo atubele normaliza filafali funsionamentu PN ne’ebé hanesan órgaun ida importante tebes hodi tau matan nafatin atividade Governasaun.
Entretantu, iha diskusaun ne’e partisipa husi Bankada FRETILIN, PLP, KHUNTO, no PD, enkuantu Bankada CNRT, FM/UDT, PUDD auzénte.
Jornalista: Antónia Gusmão
Editora: Julia Chatarina
