AINARO, 04 jullu 2020 (TATOLI)-Partidu Uniaun Demokrátiku Timorense (UDT), sábadu ne’e apoiu sasán nesesidade bázika ba família uma-kain hamutuk 150-resin iha Aldeia Betullala Suku Aituto Postu Administrativu Maubisse Munisípiu Ainaro.
Sasán nesesidade bázika ne’ebé distribui ona ba populasaun hirak ne’e maka foos, mina bimoli, supremi no seluk tan.
Sekretáriu Jerál UDT, Francisco David Xaviér Carlos hatete, apoiu ne’e hanesan jestu solidaridade ba komunidade sira hodi prienxe nesesidade báziku uma-kain nian.
“Ami mai ne’e lori mós ho ai-han balun maski lá barak maibé lori duni mai fó ba povu Aituto, ami hatene durante fulan-rua nia laran imi sofre tanba Estadu Emerjénsia no moras ida coronavirus,” dehan nia hafoin distribui apoiu ne’e iha Aituto.
Iha sorin seluk, benefisiariu, Aleixo Araújo, reprezenta komunidade hodi agradese ba estrutura partidu UDT relasiona ho apoiu ai-han hirak ne’e.
“Ami agradese tebes ba Partidu UDT ne’ebé ho laran luak fahe ona foos mai ami, UDT partidu ida ne’ebé metin ona iha ami nia fuan,” nia hateten.
Jornalista : Hortencio Sanchez
Editór : Agapito dos Santos
