DILI, 14 jullu 2020 (TATOLI) – Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, iha segunda (13/07) asina ona despaisu hodi delegasaun kompeténsia ba Sekretáriu Estadu Komunikasaun Sosiál, Merício Juvinal dos Reis ‘Akara’ atu dirije servisu balun.
“Kompeténsia ne’ebé delega ba Sekretaria Estadu Komunikasaun Sosiál (SEKOMS) mak hanesan podér atu dirije servisu sira ne’ebé dezenvolve iha Sentru Informasaun Téknika iha Komunikasaun (CEFTEC, sigla portugés) inklui Diresaun Nasionál Promosaun no Dezenvolvimentu Media Lokál (DNPDML) ne’ebé diresaun ne’e tuir rekomendasaun hosi SEKOMS muda naran hosi Sentru Rádiu Komunidadade (CRC, sigla portugés) ne’ebé sei sai parte integrante iha organizmu administrasaun direta Ministériu Asuntu Parlamentár no Komunikasaun Sosiál (MAPKOMS) nian,” relata nota imprensa ne’ebé Agência Tatoli asesu iha tersa ne’e.
Aleinde dirije servisu sira ne’ebé dezenvolve iha organizmu rua ne’e, tuir delegasaun kompeténsia hateten mós SEKOMS sei koordena ho Diresaun Nasionál Diseminasaun Informasaun (DNDI) karik servisu ruma ne’ebé iha relasaun ho diseminasaun informasaun.
Ministru Francisco mós delega kompeténsia ba Sekretáriu Estadu Akara atu propoin ba Ministru medida hirak ne’ebé konsidera importante atu regula setór komunikasaun sosiál ne’ebé inklui propoin nomeasaun ne’ebé lei haruka iha setór komunikasaun sosiál nian.
Iha despaisu ne’e mós esplika, delegasaun kompeténsia hirak ne’ebé mensiona la taka dalan atu dada filafali kompeténsia sira-ne’e no kompeténsia hirak ne’ebé maka delega ona liuhosi despaisu ne’e sei labele delega tutan tan.
Despaisu sei hahú vale iha loron tuirmai hafoin publika iha Jornál Repúblika.
Delegasaun kompeténsia ninia baze iha artigu 16 númeru 1 no alínea b, iha númeru 1 husi artigu 37 Dekretu-Lei husi Dekretu-Lei númeru 27/2020 19 juñu, ba alterasaun daruak ba Dekretu-Lei númeru 14/2018, 17 agosti kona-ba Orgánika Governu Konstitusionál VIII nian.
Jornalista: Antónia Gusmão
Editorra: Julia Chatarina
