DILI, 15 jullu 2020 (TATOLI)- Instituto Defeza Nasionál Timor-Leste (IDN-TL) kontinua fó formasaun kargu xefia na’in-150 hosi Instituisaun Estadu no liña ministériu sira kona-ba formasaun governansa no lideransa estratéjia.
Formasaun ne’e fó direita hosi oradór nu’udar mós Diretór IDN-TL Capitão – de Mar- e Guerra, Donaciano Costa Gomes “Pedro Klamar Fuik” no dosente sira seluk mak iha nivel profisionál akadémiku ne’ebé ás.
Tuir oráriu ne’ebé Agência Tatoli asesu hosi komunikadu imprensa IDN-TL haktuir, kursu avansadu ba kargu xefe, diretór jerál, diretór nasionál ho diretór munisipál sira, hahú ona iha loron 13 jullu 2020 no sei termina iha loron 22 setembru tinan ne’e.
Iha etapa primeiru (turma A) ho partisipante ema na’in-50, etapa daruak (turma B) ho partisipante ema na’in-50 no etapa da toluk (turma C) ho partisipante ema na’in-50 ho durasaun tempu kursu to’o semana ida kada turma.
Kursu Avansadu ba Lideransa Governansa no Lideransa Estratéjika realiza tanba parseria ho Gabinete Primeiru-Ministru, Komisaun Funsaun Públiku (CFP), Instituto Nasionál Admirasaun Públiku (INAP), Fundu Dezenvolvimentu Kapitál Umanus (FDCH) ho IDN-TL bazeia ba orientasaun husi Primeiru-Ministru Taur Matan Ruak.
Hahú iha loron 6 jullu 2020, retiru dahuluk ba membru VIII Governu ne’ebé lideradu husi PM, Taur Matan Ruak, Diretór IDN-TL, “Pedro Klamar Fuik”, hetan konvida sai oradór hodi partilla materiál kona-ba sentidu estadu iha ámbitu kursu formasaun avansadu no lideransa estratéjiku.
Modul ba formasaun mak hanesan, Modul 1 Prosesu konstrusaun Estadu no ba nasaun RDTL, Modul 2 Persesaun ba seguransa no Defeza Nasional, Modul 3 Prioridade Governu (politicas publikas e Gestão Estratégica), Modul 4 Sistema Jurídiku Governansa no Korrupsaun, Modul 5 kontestualizasaun konjuntura nasionál.
Diretór Akademia IDN, Guilherme Soares iha abertura formsaun hateten , Formasaun avansadu ne’e IDN inisia tiha ona ba membru governu sira iha loron 6 fulan Jullu 2020 no ohin kontinua fila fali ba diretor/a jerál , diretor/a Nasional ho diretór/a munisípais sira.
Objetivu prinsipál hosi formasaun avansadu ne’e atu dezenvolve kompeténsia téknika transversal adekuada ba dezenvolvimentu funsaun sira hosi titulares estadus governativus liuliu iha superiór administrasaun públika sira hanesan permite hodi kria komunidade governante sira, dirijente no jestór públika sira.
Formasaun ne’e mós melloria perfíl esperiénsia koñesimentu profisionál potensiador ba lideransa ida forte no mobilizador iha sintonia ho ezijénsia moderna hosi jestaun no administrasaun públika. Dezenvolve kapasidade krítika rasiosíniu ba rezolusaun problema reais iha jestaun administrasaun nian.
Iha fatin hanesan Diretór Instituto Nasional Admirasaun Públiku, Agustinho Letençio de Deus afirma, iha planu estratéjia dezenvolvimentu nasional ko’alia dehan formasaun lideransa tuir loloos remata ona iha tinan 2015, kobre ona ba diretora jerál sira, diretór nasionál ho diretór munisipál sira.
Nia hatutan, lideransa ida nia tenke iha kapasidade maneja servisu sira no lidera mós ema seluk ne’ebé servisu ho nia, atu hetan asaun hirak ne’e, hanoin importante tebes ema hotu tama iha prosesu aprendizajen ida, ho sentidu lideransa ida nia tenke prepara aan nafatin ba mudansa hotu.
Jornalista : Eugénio Pereira
Editór : Francisco Simões
