DILI, 15 jullu 2020 (TATOLI) – VIII Governu Konstitusionál realiza retiru daruak ne’ebé lidera direta husi Primeiru-Ministru (PM), Taur Matan Ruak hodi rona aprezentasaun servisu hosi entidade tolu hanesan Unidade Planeamentu Monitorizasaun no Avaliasaun (UPMA), Komisaun Nasionál Aprovizionamentu (CNA, sigla portugés), no Tecnologia da informação e Comunicação Timor (TIC Timor).
Ministru Prezidénsia Konsellu Ministru, Fidelis Manuel Leite Magalhães, haktuir aprezentasaun dahuluk hosi UPMA kona-ba planeametu, monitorizasaun no avaliasaun ba programa no orsamentu ho forma atu alkansa ezekusaun ne’ebé efisiénsia no efikásia ba programa prioridade Governu nian.
“UPMA aprezenta sira-nia servisu no lala’ok ne’ebé la’o ona, kona-ba esforsu sira ne’ebé halo tiha ona liliu kona-ba área planeametu, monitorizasaun no avaliasaun. Nune’e mós prosesu sira halo livru orsamentu ne’ebé partilla informasaun kle’an relasiona ho sira-nia knaar. Informasaun hirak ne’e importante ba membru Governu hotu atubele apár ho di’ak,” informa Ministru Fidelis hafoin ramata retiru iha salaun Ministériu Finansa, Aitarak-Laran, kuarta ne’e.
Aleinde ne’e, ezekutivu sira rona aprezentasaun husi CNA ne’ebé hanesan informasaun pertinente tebes tanba ajuda membru Governu sira hodi hatene di’ak liután sistema no regra aprovizionamentu nian.
Ikus liu maka aprezentasaun husi TIC Timor kona-ba sistema informasaun, komunikasaun no teknolojia.
“Sira fó hatene ba membru Governu, kona-ba esforsu sira-nia to’o agora no saida mak presiza atubele lori Timor-Leste lalais liu ba governasaun elétronika iha futuru. Importante tebes tanba bele ajuda transparénsia no prestasaun servisu ne’ebé di’ak liu ba sidadaun sira tanba mundu agora ne’e modernu ne’ebé ita bele halo di’ak liután no Governu mós bele presta servisu lalais no transparánsia liu bainhira utiliza meiu informasaun téknolojia ne’ebé di’ak liu,” nia subliña.
Jornalista: Antónia Gusmão
Editora: Julia Chatarina
