DILI, 20 jullu 2020 (TATOLI)–Prezidente Repúblika (PR), Francisco Guterres Lú Olo, ohin, promulga Dekretu-Lei kona-ba kriasaun empreza públika Eletrisidade de Timor-Leste (ho abreviasaun EDTL, E.P) no nia estatutu.
Xefe Estadu ne’e hateten, setór eletrisidade nu’udár pilar prinsipál ida ba dezenvolvimentu ekonomia iha País no instrumentu previlijiadu ba promosaun seguransa no moris-di’ak povu, tanba ne’e Estadu konsidera nu’udar servisu públiku esensiál.
“Dezde restaurasaun independénsia, Estadu Timor-Leste halo tiha ona investimentu oin-oin iha tinan barak nia laran fasilita fornesimentu enerjia elétrika ba territóriu nasionál atu hasa’e moris di’ak povu tomak ninian. Tanba ne’e, Governu deside atu kria medida estruturante ba setór eletrisidade lihosi kriasaun EDTL, E.P no nia estatutu,” dehan PR Lú Olo liuhosi komunikadu imprensa ne’ebé Agência TATOLI asesu liuhosi Prezidensia Repúblika, segunda ne’e.
Atribuisaun EDTL, E.P mak apoiu Governu ba definisaun polítika rekursu enerjétiku, halo Planu Eletrifikasaun Nasionál, promove uza efisiente enerjia eléktrika, asegura fornesimentu enerjia elétrika ba konsumu, kualidade fornesiementu, hadi’ak sistema integradu automatizasaun no komunikasaun, medida ba kontrolu no inspesaun ba eliminasaun konesaun ilegál, ezerse atividade importasaun no esportasaun enerjia elétrika.
Dekretu-Lei ne’e aprova iha Konsellu Ministru iha 11 marsu 2020, ho baze artigu 115, númeru 3 Konstituisaun RDTL.
Ho promulgasaun Dekretu-Lei ne’e sei transforma Direção Gerál de Eletricidade pertense ba Ministériu Obras Publikas ba Empreza Públika (EP) ho naran Eletrisidade de Timor-Leste, E.P (EDTL, E.P.)
Empreza Públika Eletrisidade de Timor-Leste nu’udar pesoa koletiva públika, integradu iha administrasaun indireta Estadu ho personalidade jurídika no kapasidade judisiáriu, autonomia administrativa, autonomia finanseira no partrimóniu propriu.
Membru Governu ne’ebé responsável ba enerjia elétrika sei ezerse nia poder atu tutela no superviziona EDTL, E.P. liuhosi Conselho de Administração, Comissão Ezecutiva no Conselho Fiscal.
Jornalista : Cipriano Colo
Editór : Cancio Ximenes
