DILI, 21 jullu 2020 (TATOLI)- Prokuradór Jerál Repúblika (PJR), José da Costa Ximenes, relata ba Prezidente Repúblika (PR), Francisco Guterres Lú Olo katak, movimentasaun prosesuál no balansu jerál Ministériu Públiku (MP) durante fulan-neen, rejista prosesu liu 2060.
“Movimentasaun prosesuál iha nível nasionál hamutuk 384 ne’ebé tama iha Ministériu Públiku no konsege finaliza prosesu liu 500, sura ho kazu anteriór sira. Totál prosesu to’o loron 1 fulan janeiru 2020 iha 3.400 no iha fulan-6 rejista prosesu ho totál liu 2.060. Signifika, durante fulan lima nia laran Ministériu Públiku servisu ho prosesu hamutuk liu 5.500. Ministériu Públiku durante fulan 6 prosesa liu 2.600, akuzasaun 1.400 no arkiva 1.100”, José Ximenes hato’o asuntu ne’e ba jornalista sira.
Nia hateten, númeru ne’e, la inklui julgamentu, primeira interogatóriu, julgamentu móvel, julgamentu sumáriu no delijénsia ne’ebé Ministériu Públiku rasik partisipa.
“Ne’e la inklui julgamentu sira ne’ebé prokuradór sira ba no partisipa, la inklui primeiru interrogatóriu ba arguidu detidu sira ne’ebé prokuradór sira ba no partisipa no promove, la inklui julgamentu móvel sira ne’ebé tribunál halo, la inklui julgamentu sumáriu sira ne’ebé Ministériu Públiku rasik promove no partisipa, la inklui delijénsia hotu ne’ebé ita tuir no partisipa durante fulan neen atividade Ministériu públiku ninian” José esplika.
Prosesu sira ne’ebé rejista iha Ministériu Públiku, PJR hateten, dominante ho kazu ofensas ba integridade, violénsia doméstika, krime seksuál no omisidiu grave.
Entretantu, Ministériu Públiku, hanesan mós Tribunál sei tama iha férias judisiáriu, husi 1 agostu-15 setembru.
Maske iha ferias nia laran, Prokuradór sira sei servisu iha turnu atu atende kazu sira relasiona ho primeiru interogatóriu, julgamentu sumáriu no kazu ho karáter urjénsia.
Notísia relevante:MP Husu Tribunál Fó Justisa Ba LSH Nu’udár Sidadaun Estranjeiru
Jornalista : Cipriano Colo
Editór : Rafy Belo
